Осыған орай, Қызылорда қаласының әкімі Нұрлыбек Нәлібаев қаладағы карантиндік шектеу шараларын пысықтау мақсатында шұғыл мәжіліс өткізді.
Мәжілісте Ақсуат ауылдық округіне қарасты Ж.Махамбетов ауылында болған тәртіпсіздік талқыланды. Яғни, ауыл тұрғыны тыйым салынған шектеулерді ескермей, 100-ге жуық адам жинап, той жасаған. Тойдың өту барысында тұрғынмен атыс қару қолданылып, салдарынан екі бүлдіршін дене жарақатын алған.
Аталған тәртіпсіздіктің болуына жол берген Ақсуат ауылдық округінің әкімі бұл мәселеге қатысты пікірін «Той егесіне ауызша да, жазбаша да ескерту жасадым. Менің ескертуімді назарға алмай той жасады» деп қысқа қайырды.
Пандемия уақытынды ауылдың қоғамдық-саяси ахуалын тұрақты бағытта ұстай алмай, тойдың болғанын қала әкімдігіне дер кезінде хабарламай, шарасыздық танытқан округ әкімі Мәмбетәлі Ақмырзаевқа қала әкімі қатаң сөгіс берді.
«Ауыл тұрмысын түзетуде атқарған жүйелі еңбектеріңізді ескеріп, қатаң сөгіспен қалдырдым» деген әкім басқа да кент және ауылдық округ әкімдеріне өздеріне сеніп тапсырылған аумақта бақылауды арттырып, алдын алу шараларын күшейтуді нықтап тапсырды.
Сондай-ақ ауылдық округтің аймақтық полиция қызметкерін дер кезінде қажетті шараларды қолданбай, тиісті органдарға хабарламағаны үшін тәртіптік жауапкершілікке тартуға қалалық Полиция басқармасына нұсқау берді.
Бұған дейін қалаға қарасты Қызылжарма ауылдық округінде ауыл тұрғыны аулада той өткізбек болған. Алайда той қалалық мобильді топтың араласуымен тоқтатылды. Аталған мәселеге байланысты ауыл әкімі Медет Сейіловтің аталмыш оқиғаны дер кезінде хабарлағаны ескеріліп, ескерту берілді.
Қала әкімдігінің Әдеп жөніндегі уәкілі мен сала басшыларына кент және ауылдық округ әкімдерінің қызметіне талдау жасап, олардың қызметіне қатысты ұсыныс беруді жүктеді.
Мәжіліс соңында қала әкімі ауыл әкімдеріне карантин талаптарын сақтауда жоғары жауапкершілікпен жұмыс істеу керегін тағы да қатаң ескертті.
Миуа БАЙНАЗАР,
Қызылорда облысы
