«Астана банкінің» басшылығы ақша ұрлады деген күдікке іліккен болатын. Алайда енді олардың әрекеттерінде қылмыстық құрам жоқ деген дәйектемемен қылмыстық іс тоқтатылды. Тиісінше, сотқа дейінгі тергеу де доғарылды.
Қазіргі кезде бұл қаржылық ұйымның жойылғаны мәлім. Мемлекет оның ең ірі салымшысы болды. Бірақ жүйе құраушы ірі банк саналмағандықтан, билік оны құтқарып жатпады. «Сыбайлас жемқорлыққа қарсы қызмет кредиттік қаражаттарды негізсіз беру фактісі (Қылмыстық кодекстің «Сенiп тапсырылған бөтен мүлiктi иемденiп алу немесе талан-таражға салу» атты 189-бабының 4-бөлімінің 2-тармақшасы) бойынша Астана банкінің басшылығына қатысты сотқа дейінгі тергеу жүргізді. Қылмыстық іс ақыр соңында Қылмыстық-процестік кодекстің 35-бабының 1-бөлімінің 2-тармақшасының негізінде (іс-әрекетте қылмыстық құқықбұзушылық құрамының болмауы себепті) тоқтатылды», – деді Алматы прокуратурасы informburo сұрауына жауабында. Алматы прокуратурасы банкрот болған банкті сол күйге дейін жеткізген банкирлерге қатысты тексеру жүргізуді қажет деп таппапты. Астана банкі 2018 жылдың 19 қыркүйегінде банк операцияларын жүргізу лицензиясынан айырылды. Бұған оның жүйелі түрде бұзушылық жасауы, атап айтқанда азаматтар мен заңды тұлғалардың жасаған төлемдері және аударымдары бойынша өз міндеттемелерін орындамауы, қаржылық реттеуші бекіткен пруденциалдық нормативтерді бұзуы, банктің ірі қожайынының Ұлттық банктің қосымша капиталдандыру талабын елемеуі себеп болды.Елдос СЕНБАЙ