Қазақстан ұлттық құрамасының капитаны, «Әл-Айн» командасының ойыншысы Бауыржан Исламханның Азия чемпиондар лигасы аясында өткен «Әл-Садд» – «Әл-Айн» матчынан кейін тапсырған сынамасынан допинг табылды. Осыған байланысты Азия футбол конфедерациясы (AFC) Бауыржанды ресми ойыннан шеттетті.
Қос команда арасындағы матч 18 қыркүйекте өткен болатын. Аталған кездесуде Исламхан алаңда 68 минут ойнады. Ал футболшының командасы бұл жарысқа ойынға бір апта уақыт қалған кезде келді. Сол аралықта ойыншыларға клуб аумағынан сыртқа шығуға рұқсат берілмеген. Яғни, тыйым салынған препарат қазақстандық жартылай қорғаушының ағзасына Катарда жүрген уақытта түсуі мүмкін екені айтылуда. Хаттамаға сәйкес, AFC футболшы қанындағы күмәнді элементтің пайда болу себебін түсіндірмейінше, ойыншыға лига деңгейінде уақытша дисквалификация тағайындауға құқылы. Табылған препаратқа толық сараптама жүргізу үшін екінші рет сынама жүргізіліп, ресми аккредиттелген зертханаларға жіберіледі. Тек содан кейін айыппұл көлемін, дисквалификация уақытын белгілеу жұмыстарымен құзыретті комитет айналысады. Таяуда Alittihad.ae басылымы «Әл-Айн» командасының ойыншысы Бауыржан Исламханды оң допинг-сынамадан кейін Азия футбол конфедерациясының ойыннан шеттету туралы шешіміне түсініктеме берді. – Исламхан уақытша ресми ойындардан шеттетілді. Футболшының алаңға оралатын уақыты белгісіз. Жаза мерзімі алты ай, кейбір жағдайда одан да көп болуы мүмкін, – деп жазды спорттық басылым. Ал спорт сарапшысы Айдын Қожахмет мұндай жағдай қазақ футболының тарихында бірінші рет болып отырғанын айтады. – Қателеспесем, Бауыржан – Қазақстан тарихындағы допингпен ұсталған алғашқы футболшы. Бұған дейін допинг сынамасы футболшыларымыздан табылмаған. Бірақ Бауыржан допинг қабылдады деп айту әлі ерте секілді. Істің ақ-қарасын мамандар анықтап жатыр. Біз сынамада футболшының қанынан қандай элемент табылғанынан хабарсызбыз. Ол допинг па, жоқ допингтің ізін жоғалтатын элемент пе, білмейміз. Яғни, ештеңе толық дәлелденген жоқ. Естуімше, Бауыржанның агенті мықты заңгерлерді шақыртқан. Қазір олар бұл іспен айналысып жатыр. Әзірге футболшы ешқандай ойындарға қатыса алмайды. Бірақ дисциплиналық жауапқа тарту қабылданбады. Істің анық-қанығын желтоқсан айының басында білетін боламыз. Қанында табылған препараттың күштілігіне байланысты футболшыға жаза қолданылады. Егер допинг емесі анықталып, допингтің ізін жоғалтатын элемент болса жазаның түрі де жеңілдетіледі, – дейді ол. Жалпы, Қазақстан спортының тарихында допингпен ұсталған спортшылар баршылық. Әсіресе бізге Илья Ильин мен Винокуровтың даулы мәселесі жақсы таныс. Қос спортшының допинг сынамасын нағыз допинг деп айтуға болады. ВАДА қазақстандық зілтеміршінің тыйым салынған препаратты әдейі қабылдағанын анықтады. Ал Винокуровтың жарыс алдында қан алмастырғаны белгілі болды. Анықтап айтар болсақ, көп спортшылар нағыз бабына келген уақытында өзінен қан алып, оны мұздатқышта сақтайды. Жарыс алдында сол қанды өзіне кері салдыртады. Сол кезде спортшының күші көбейеді-мыс. Қазақстандық велоспортшының мұндай қадамға бейсаналы түрде барғаны дәлелденіп, жаза қолданылды. «Спартак Москваның» футболшысы Егор Титовтың да бір кездері допингпен ұсталғанын айта кеткен жөн. Оның қанынан бромонтан деген препарат табылған. Тиісінше, оған берілген жаза түрі де ауыр болды. Негізі, бұл дәрінің түрін спортшыларға қолдануға қатаң түрде тыйым салынған. Еуропада бромонтанды спортшылардың қабылдамағанына 30 жылдай уақыт болыпты. Егер қазақ футболшысының қанынан осы тектес препарат табылатын болса, онда спортшының спорттық мансабына ауыр соққы болары сөзсіз. Күні кеше Қазақстан футбол федерациясының бас хатшысы Азамат Айтқожин футболшы Бауыржан Исламханмен допинг дауы жайлы сөйлескенін әлеуметтік желідегі парақшасында жазды. – Ұлттық құраманың капитаны Бауыржан Исламханмен телефон арқылы сөйлестік. Ол клуб дәрігерінің барлық нұсқаулығын бұлжытпай орындағанын түсіндірді. Сондай-ақ Бауыржан кез келген тексерістен өтіп, қажет деген анализдерді тапсыруға дайын екенін айтты. Қазақстан футбол федерациясы клубқа жағдайды түсіндіруін сұрап ресми хат жіберді. Барлығы футболшының пайдасына шешіледі деп сенеміз. Федерация өз кезегінде Исламханға қолдау көрсетеді және кез келген жағдайда көмек қолын созуға әзір, – деді ҚФФ бас хатшысы. «Әл-Айн» футбол клубының бас жаттықтырушысы Педро Эммануэль де командада ойнайтын футболшысының уақытша ойындардан шеттету жайында түсініктеме беріп, бұл заңды мәселе екенін, бірақ команда Исламханды қолдайтынын айтқан. Қазақстан футбол федерациясының Ұлттық құрамалар департаментінің директоры Қайрат Нұрдәулетов те бұл жағдайға қатысты ойымен бөлісіп, спортшыға қолдау білдірді. Әрі қарай қандай шешім қабылданары әзірге белгісіз. Өйткені әлі екінші сынама қорытындысы нақтыланып, толық шешім шықпады. Допинг сынамасынан сүрінген ұлттық құрама капитанына қатысты әділ шешім шығарылып, қазақстандық футболшының тезірек алаңға оралуына тілекшіміз.
Абылайхан ЖҰМАШ