Алматыда 10 адамды өлтірді деп айыпталған ер адам өмір бойына бас бостандығынан айырылды.
Алматы қалалық қылмыстық істер жөніндегі мамандандырылған ауданаралық сотының мәліметі бойынша, С. есімді ер адам 2013 жылы сегіз адамды өлтіргені үшін өмір бойына бас бостандығынан айырылған. Жазасын «Қара бүркіт» қылмыстық-атқару жүйесі мекемесінде өтеп жатқан ол жақында тағы екі әйелдің өліміне қатысы бар екені анықталды. Сот бүгін осы іске қатысты шешім шығарды.
«2001 жылдың күзінде С. жәбірленушілер Б. мен К.-ның пәтерлерін иемдену мақсатында олардың сеніміне кірген. Сол жылдың қазан айында Б. мен К. есімді әйелдерді жалға алған үйге шақырып, онда ол басқа адамдармен бірге оларды өлтірген. Кейіннен сотталушы мен тағы басқа адамдар меншік құқығының құжаттарын иемденіп, жалған сенімхаттар арқалы пәтерлерді сатқан», – делінген сот хабарламасында.
Сотталушыға Алқабилер сотының шешімімен Қылмыстық кодекстің 96-бабы, 2-бөлігі, «а, ж, з» тармақтары бойынша қайтадан өмір бойына бас бостандығынан айыру жазасы тағайындалды. Үкім заңды күшіне енбеді.
