– Әй, бұл не? – деп сұрады Батыс Қазақстан облысы денсаулық сақтау басқармасының бұрыңғы бастығы.
– Бір шелек айран, – деді сыбайласы.
– Қайдан?
– Мемлекеттік сатып алу бойынша.
– Жалап жатырсың ғой?
– Жоға, «қаймағы қандай?» деп қ арап жатырмын... Кешіріңіз, басеке, кезінде «Бірге жалайық!» деп едіңіз...
– «Жалайық, жалайық!» дейді ғой, тілің құрысын, күректей болған!
– Ой, сіздің тіліңіз тырма сияқты ғой, жан–жағын жинап алатын...
– Осылай халық айранын жалауға қалай ұялмайсың? Коррупция ғой? –деген бастық шелекке еңкейіп, бір жалап қойды.
– Осылай жалап жатқан кім бар? Көрдіңіз бе,не? –деген сыбайласы да шелекке еңкейіп, бір жалап алды.
– Осылай жалай берсек, халықтың жағдайын кім ойлайды, а? –деген бастық тағы жалады.
– Осылай жалай беретіндерді соттау керек! –деген анау да жалап үлгерді.
– «Жалайық, жалайық!» дейді ғой, ал жаладық, қалғаны халыққа жетеді ме?
– Әшейін, саусақтарын батырып, сорады.
– Не үшін?
– Ішектері ағару үшін.
– Қоймадың ғой! біздің басқармаға бюджеттен бөлінген айран болса, бәрімізге жетеді. Қазір әкім келеді, ол жаласын, сот келеді, ол да жаласын, прокурор жаласын! Сен жала, мен жалайын. Әшейін айтамын-ей!
Бір кезде тағы бір сыбайласы келді де аңқиып тұрып қалды.
– Айран ба, не? –деп міңгірледі ол.
– Ия, айран, айран? –деп кекетті Каюпов Сосын тағы бір сыбайласына телефон шалды.
– Алло? «Келе жатырмын!» дейсіз бе? Тезірек келіп, жалап кетсеңізші? Жалмауыздар жалап қояр емес! –деген бастық айранға саусағын батырып, жалай бастады. Бір кезде, тағы бір сыбайлапсы келді.
– Келісім бойынша, айран жалайын деп келдім, Дәмі қандай екен?, –деп сұрады ол.
– Айран ашып кетіпті... Түк дәмі жоқ... –деді сыбайластардың бірі.
– Мейлі, ашыған айран, ашыған миға пайдалы.
– Айран іртік–іртік екен, –деді анау желкесін қасып.
– Іртік айран ішіп көрмеппін, құйып жібер.
– Кешіріңіз, айран құрттап кетіпті...
– Құрттағаны жақсы. «Айран с мясом.» болады, –деді де, жаңа келген сыбайлас жемқор айранннан жалай бастады. Жалағанда аузының су құри жалады. Білегінен аққан айранды емірене жалады. Сосын кеңкілдеп күліп еді, оған қосыла бәрі күлді.
Каюпов және оның сыбайластары шын мәнінде айран жаламаса да, мердігер компаниямен медициналық жабдықтарды, мониторларды жеткізуге мемлекеттік сатып алу бойынша жалпы құны 78 миллион теңге бөлініп, шарт жасасқан еді. Қу құлқын қойсын ба, жемқорлар бұл өмірде тойсын ба, орындалған жұмыстар мен қабылдау актілеріне кедергісіз қол қойып беру үшін пара алып, көңілдерін бір демдеп қойған болатын. Бірақ, жолдары болмады, 7 миллион 800 мың теңгені санасып жатқанда, қолдарына кісен салынып, тергеу абақтысына тоғытылды. Қу, құлқын-ай, десеңізші!
