2 желтоқсанда өткен отырыста Қазақстан Орталық сайлау комиссиясы «Nur Otan» партиясының партиялық тізімін тіркеді. Жиынға саяси партиялардың, Бас прокуратураның, Әділет, Ішкі істер және Қаржы министрліктерінің өкілдері, бейнеконференцбайланыс режимінде аумақтық сайлау комиссиялары, онлайн режимінде бұқаралық ақпарат құралдарының өкілдері қатысты. Сонымен қатар отырысты Мәжіліс және мәслихаттар сайлауына халықаралық ұйымдардың байқаушыларын аккредиттеу мәселесі де қаралды.
Отырысты ашқан ОСК төрағасы Берік Имашев Мәжіліс депутаттығына кандидаттардың партиялық тізімдерін ұсыну мерзімі 30 қарашада сағат 18.00-де аяқталғанын еске салды. Партиялық тізімдерді Орталық сайлау комиссиясына бес саяси партия ұсынған. «Nur Otan» партиясы Қазақстан Парламенті Мәжілісінің депутаттарын сайлауға кандидаттарды ұсыну туралы құжаттарды ОСК-ға 2020 жылғы 26 қарашада ұсынған-ды. Ортсайлауком мүшесі Смағұлов Асылбектің айтуына қарағанда, Мәжіліс депутаты болып сайлану үшін кандидат Қазақстан Республикасының азаматы болуға, Қазақстан Республикасының аумағында соңғы 10 жылда тұруға, 25 жастан кіші болмауға, белсенді сайлау құқығына ие болуға тиіс. «Қазақстан Республикасындағы сайлау туралы» Конституциялық заңның 89-бабына сәйкес бір саяси партиядан тізімге енгізілген адамдардың саны саяси партиялар арасында бөлінетін депутаттық мандаттардың белгіленген санынан отыз пайызға аспайтын бір ғана тізімді тіркеуге жол беріледі. Партиялық тізімде әйелдер мен жиырма тоғыз жасқа толмаған адамдардың саны оған енгізілген адамдардың жалпы санының кемінде отыз пайызын құрауға тиіс. «Nur Otan» партиясының партиялық тізімінде 126 адам бар. Әйелдер мен жиырма тоғыз жасқа толмаған адамдар – 40, тізімге енгізілгендердің жалпы санының 31,7 пайызы. Уәкілетті органдар ұсынған мәліметтер негізінде Орталық сайлау комиссиясы Мәжіліс депутаты болып сайлану үшін партиялық тізімге енгізілген адамдардың Конституция мен «ҚР сайлау туралы заңы» талаптарына сәйкестігіне тексеру жүргізді. Партиялық тізімге енгізілген барлық адам Конституция мен «ҚР сайлау туралы заңы» талаптарына сай келеді. Осыған байланысты, Ортсайлауком мүшелері «2021 жылғы 10 қаңтарға тағайындалған Қазақстан Парламенті Мәжілісі депутаттарының кезекті сайлауында «Nur Otan» партиясының партиялық тізімін тіркеу туралы» қаулы қабылдады. Ал Ортсайлауком мүшесі Анастасия Щегорцованың сөзіне қарағанда, 2020 жылғы 20 қарашада Сыртқы істер министрлігінің ұсынуы бойынша Орталық сайлау комиссиясы ТМД Парламентаралық Ассамблеясынан 29 байқаушыны аккредиттеген. Сонымен қатар 2020 жылғы 25 және 26 қарашада Сыртқы істер министрлігінен 10 байқаушыны аккредиттеу туралы ұсыныстары келіп түсті. Олардың ішінен 6 байқаушы – Тәуелсіз Мемлекеттер Достастығынан байқаушылар миссиясы құрамында, 4 байқаушы Ислам ынтымақтастығы ұйымы миссиясынан аккредиттеледі. А.Щегорцова аккредиттеуге ұсыныстардың келіп түсуіне қарай байқаушылар бойынша деректер жаңартылып отыратынын атап өтті. Халықаралық байқаушыларды аккредиттеу 2021 жылғы 4 қаңтарда сағат 18.00-ге дейін жүзеге асырылады.А.СҰЛТАН