Атырауда облыстық перинаталды орталықтың тоңазытқышына салынған сәби өліміне қатысты іс бойынша сот процесінің соңғы кезеңі - тараптардың жарыссөзі басталды.
Атырауда болған жантүршігерлік оқиғаға нүкте қойылатын күнді жақындатар сот отырысында прокурор Нұржан Жангереев бес айыпталушыға қатысты айыптау қорытындысын оқыды.
Прокурор соттан облыстық перзентхананың бұрынғы бас дәрігері Қуаныш Нысанбаевты кінәлі деп танып, оған Қылмыстық кодекстің бірнеше бабының жекелеген тармақтарына сәйкес бүкіл қылмыс бойынша 20 жылға бас бостандығынан айыру жазасын тағайындауды сұрады.
Сотта Қ.Нысанбаевтың бір топ адаммен алдын ала сөз байласу арқылы кәмелетке толмаған баланы өлтіру, сеніп тапсырылған бөгде мүлікті иемдену, қызмет бабын асыра пайдалану, пара алу және беру баптары бойынша айыпталып отырғаны айтылды.
Акушер-гинеколог Асқар Қайыржан мен акушер Жәмила Құлбатырова үшін прокурор 17 жылға бас бостандығынан айыруды сұрады. Оларға «адамдармен алдын ала сөз байласу арқылы көрінеу кәмелетке толмаған баланы өлтірді» деген айып тағылды.
Сондай-ақ прокурор Н.Жангереев перзентхананың неонатолог дәрігерлері Руслан Нұрмұхамбетов пен Дариға Жұмабаеваны қылмыс туралы хабарламағаны үшін айыптап, әрқайсысының бас бостандығын үш жылға шектеуді сұрады.
Айыптаушы тарап айыпталушылардың кінәсі куәгерлердің айғақтарымен, Батыс Қазақстан облысы сот-медициналық сараптамасының алғашқы және Қарағандыдағы екінші комиссияның қорытындысына сәйкес толық дәлелденді деп есептейді. Бұл қорытындыларда Н.Тұрымбетова мен Р.Молдағалиеваның сәбилері дүниеге тірі келді делінген.
Прокурордан кейін жәбірленушілер Нұржамал Тұрымбетова мен Роза Молдағалиеваларға сөз берілді. Жәбірленушілер айыптауды толығымен қолдап, моральдық зиянды өтеу туралы талап-арыздарын қанағаттандыруды сұрады. Жәбірленуші тараптар Қ.Нысанғалиевтан моральдық зиянды өтеуге 10 миллион теңгеден өндіріп алуды сұрады. Н.Тұрымбетова акушер-гинеколог А.Қайыржаннан 10 миллион, Ж.Құлбатыровадан 5 миллион және екі неонатологтан 2 миллион теңгеден талап етті.
Айыптау қорытындысына сәйкес, перзентханадағы тоңазытқышқа тірідей салынған Н.Тұрымбетованың сәбиі туралы оқиғаны ел түгел біледі.
Ал екінші жәбірленуші Роза Молдағалиеваның сәбиіне қатысты өтіп жатқан және Қ.Нысанғалиев қызмет бабын асыра пайдаланды деп айыпталған оқиғаны көпшілік ұмытып та қалды. Бұл оқиға Р. Молдағалиеваның сәбиі дүниеге келгендегі деректерді бұрмалауға қатысты болып отыр.
Былтырғы 13 қыркүйекте Р.Молдағалиева Даун синдромы және трисомия диагнозы бар сәби туды. Туған кезде жүрегі соқпаған сәби сәлден соң тіршілік нышанын білдіріп, жарты сағаттан соң шетінеп кеткен.
Ал перзентхананың бас дәрігері Қ.Нысанбаев сәбидің ауру тарихына «ұрықтың антенатальды өлімі», яғни босанғанға дейін өлген деп жазуды бұйырған. Нақтысында сәбидің дүниеге келу, ауру, шетінеу тарихы жазылатын журналда «сәбидің босану кезіндегі өлімі» деп көрсетілуі тиіс.
Алғашында тіршілік белгісі болмай, сәлден соң жүрегі соғып, жарты сағаттай өмір сүрген жаңа туған шақалаққа ешқандай медициналық көмек көрсетілмеген, жансақтау бөлмесіне шұғыл жеткізіп, ем-дом жасау шаралары жүргізілмегені белгілі болған. Сәбидің анасы Р.Молдағалиеваның аналық жанайқайы да өткен оқиғаның қайталанбауына сабақ болса жақсы.
Тірі туып, тоңазытқышта шетінеген шақалақтың өліміне қатысты сот отырысы әлі де жалғасады.
Тұрсын ЖҰМАБЕКҚЫЗЫАтырау облысы
Тұрсын ЖҰМАБЕКҚЫЗЫ
Атырау облысы