«Nur Otan» партиясы Батыс Қазақстан облыстық филиалы төрағасының бірінші орынбасары Мұрат Мұқаев Орал қаласының спортшыларымен онлайн кездесті.
Саламатты өмір салты мен оралдық спортшылардың жетістіктері кездесудің басты тақырыбына айналды. Партияның облыстық филиалы төрағасының бірінші орынбасары жастардың спортта жеткен жетістіктеріне ерекше назар аударып, жақында Қазақстан бокс чемпионатында 18 жастағы Даниал Сәбиттің сәтті өнер көрсеткенін ерекше атап өтті. Кездесуде сөз алған Даниал Сәбит өзіне жанашырлық танытып, жанкүйер болған жандарға алғысын жеткізді. – Бокстан ересек спортшылар арасындағы Қазақстан чемпионатында жеңіске жеттім. Жеңімпаз болғаныма өте қуаныштымын, мен үшін бұл үлкен тосын сый болды, – деп жарыстан алған әсерімен бөлісті. Ал Орал қаласы спорт бөлімінің басшысы Артур Шерғалиев боксшының шеберлігін жоғары бағалап, оған алдағы жарыстарда сәттілік тіледі. – 4 жыл бұрын Жастар сарайында Данияр Елеусінов атындағы спорт орталығын аштық. Осы орталықта арнайы бір залды жабдықтап, спортшыларды дайындай бастадық. Даниал Сәбит те бұл жетістікке өзінің маңдай тері мен жаттықтырушыларының ерен еңбегінің арқасында қол жеткізді. Осындай жеңістер көп болу үшін қаламызда боксқа арналған мамандандырылған спорт залдарының тағы да бірнеше жерден ашылғанын қалаймыз, – деді А.Шерғалиев. Өз кезегінде «Nur Otan» партиясы облыстық филиалы төрағасының бірінші орынбасары Мұрат Мұқаев Орал тұрғындарының арасында ең танымал спорт түрлеріне талдау жасау қажетін, жаңа мамандандырылған спорт залдарын ашуға жаттықтырушылар және штат саны жеткілікті екеніне көз жеткізу керегін айтты.Әбілмансұр ЖАСАН