Алматы зообағының мамандары Алькор атты 31 жасар ақ аюды өлтіруге мәжбүр болды. Бұл ақпарат зообақтың Instagram желісіндегі ресми парақшасында жарияланды. Онда мамандар бұл шараға амалсыз барғаны жазылған.
«Алькордың жағдайы мүшкіл екенін хабарлағанбыз. Соңғы 2 айда Ресей, Израиль зообақтарының ветеринар дәрігерлерімен, EAZA мамандарымен бірлесе отырып, Алькорды емдеуге барынша күш салдық. Бірақ кәрілікке дауа жоқ. Кейінгі кезде аю жеңсік асынан да бас тарта бастады. Халықаралық зообақтар қауымдастығының мамандарымен кеңесіп, бүгін осы бір ауыр шешімді қабылдадық. Алькордың жаны қиналмасын деп ветеринарлар оған эвтаназия жасады» делінген жазбада. Ақ аю Алматы зообағына 1990 жылы 1 жасар қонжық кезінде әкелінген. Бұған дейін зообақ мамандары аюдың сырқатына байланысты вольердің әйнек қабырғасын жапқан болатын. Ақ аюлар халықаралық Қызыл кітапқа енген. Қазір әлемде 20 мың ақ аю бар.Еркебұлан НҰРЕКЕШ