Жаңаөзенде инкассаторларға шабуыл жасағандардың барлығы қолға түсті. Бұл туралы Polisia.kz сайты хабарлады. Күдіктілер уақытша ұстау изоляторына қамалды. Қазіргі уақытта инкассаторларға шабуыл жасау фактісі бойынша Қылмыстық кодекстің 192-бабы 4-бөлігіне сай тергеу жүргізіліп жатыр.
3 желтоқсан күні сағат 18.33-те Жаңаөзен қаласы Полиция басқармасының Жедел басқару орталығына 4 шағынаудандағы банк бөлімшесінің жанында тұрған инкассатор машинасына шабуыл жасалғаны туралы хабарлама түсті. Қылмыскерлер инкассатор жүргізушісін пышақпен қорқытып, 76 миллион теңгені алып кеткен. Инкассатор жүргізушісі олардың соңынан бірнеше рет оқ атқан. Қарақшылық туралы хабар алысымен полиция қызметкерлері оқиға орнындағы бейнебақылау камераларын мұқият зерттеді. Қылмыскерлер бой жасыруы мүмкін маршруттар жасалып, Жаңаөзен қаласына кіріп-шығатын жолдың бәрі жабылды. Оқиға куәгерлерінен жауап алынды. Деректер базасы бойынша қарақшылар мінген автокөліктің сипаттамасына сәйкес келетін барлық автокөлік тексерілді. Түн ортасында іздеудегі көлікке ұқсайтын машина ұсталды. Видеоны сол жерден зерттеген олар оқтың тиген жерін анықтап қарағанда, оны бір нәрсемен бітеп жасырғанын байқады. Сондай-ақ инкассаторлық компанияның жұмыс орнын да анықтап, полиция жүргізушіні қылмыс жасады деген күдікпен ұстады. Алайда ол қарақшылық шабуылға қатысқанын теріске шығарып бақты. Ұсталған адамның таныстары мен байланыстарын анықтау жұмысынан кейін шабуыл жасаған тағы бір күдікті қолға түсті. Тінту кезінде одан үйдің қазандығына көміп тастаған ұрланған ақшаның бір бөлігі табылды. Кеше полиция қылмыстың үшінші қатысушысын ұстады. Қылмыскерлер бір ай бойы инкассаторларға шабуыл жасауға мұқият дайындалған екен. Олар инкассатор машинасының бағыты мен қозғалыс уақытын есептеп, өзара тиісті міндетті бөлісіп, қару таңдаған. Ал ұрланған ақшаны қаскүнемдер өзара бөлісіп алыпты.Тұмар МЫРЗА