«Халықтың сүйіктісі» ұлттық сыйлығын табыстау рәсімі 25 желтоқсанда өтеді. Шара карантиндік шектеу шараларының талаптарын сақтай отырып, белгілі бір адамдардың қатысуымен өтеді.
Дәстүрлі «Халықтың сүйіктісі» ұлттық сыйлығының лауреаттары кімдер екенін осыған дейін жазған болатынбыз.
Осымен оныншы рет өткізіліп отырған жобада тоғыз аталым бойынша үздіктер белгілі болды. Қоғамның барлық саласын қамтыған ұлттық сыйлықтың беделі жоғары.
Биыл «Жылдың үздік оқытушысы» аталымын Нұр-Сұлтан қаласындағы №17 мектеп-гимназияның география пәні мұғалімі Төлеген Әбдірайысов пен Қазақ ұлттық өнер университетінің доценті Нина Григорьева иеленді. Қызылорда облыстық жұқпалы аурулар ауруханасының бөлімше меңгерушісі Болат Асанбаев «Жылдың үздік дәрігері» болса, UFC-дегі қазақстандық жекпе-жек шебері Шафкат Рахмонов үздік спортшы атанды.
Қоғам қайраткерлерінің көшін бастап, аталымды жеңіп алған – қайырымдылар клубының негізін қалаушы Гүлмира Әбдірашева. Ал «Хабар» телеарнасының тележүргізушісі Дмитрий Олейников «Жылдың үздік тележүргізушісі» атанды. Әлемдік деңгейде танылған Димаш Құдайберген – «Жылдың мәдениет қайраткері», Парламент Мәжілісінің Төрағасы Нұрлан Нығматулин «Жылдың үздік парламентарийі» болды. Сауатты сараптамаларымен оқырман жүрегінен орын тапқан журналист Михаил Козачков «Жылдың үздік публицисі» номинациясын жеңіп алды. Сонымен қатар блогосферадағы көшбасшылардың да есімдері белгілі болды. Олар –Насима Қорғанбекова мен Қазбек Майгелдинов. Сонымен қатар «Жылдың үздік ақпараттық интернет басылымы» аталымында Azattyq Rýhy сайты жеңімпаз атанды.
Мұнан бөлек, сыйлықты ұйымдастырушылар мен қазылар алқасы еліміздің денсаулық сақтау жүйесінің өкілдерімен келісе отырып, коронавирус індеті кезеңінде зор рөл атқарған медицина қызметкерлері мен еріктілерді сыйлықтың құрметті аталымдарымен марапаттау туралы шешім қабылдаған. Атап айтқанда: «Жылдың үздік медбикесі» – Маңғыстау облыстық ауруханасының аға медбикесі Айнұр Батырбаева, «Санитарлық-эпидемиологиялық қызметтің үздік қызметкері» – Ақмола облысы Бурабай аудандық басқармасының департамент басшысы Сералы Жолдасбаев, «Үздік медициналық стационар» – Қарағанды облысындағы «Профессор Х.Мақажанов атындағы көпбейінді аурухана»; «Үздік волонтер» – «Қоғамдық бақылау» жобасының үйлестірушісі Саида Тәукелова, «Жыл бизнесі» – Нұр-Сұлтан қаласындағы санитарлық қызмет көрсететін ORKIN ЖШС директоры Талғат Дүйсеков, «Жыл меценаты» – Қызылорда облысындағы «Жан Арай Жем» ЖШС директоры, кәсіпкер Бақдәулет Мақашев.
