Шекаралас аймақтардағы жергілікті тұрғындар арасындағы қақтығысқа екі жүзге жуық адам қатысқан.
18 желтоқсан күні таңертең қырғыз-тәжік шекарасы учаскелерінің бірінде шекара маңындағы ауылдардың тұрғындары арасында жанжал болды. Жаппай қақтығыс салдарынан қырғыз шекарашыларының бірі жарақат алды, – деп хабарлайды Sputnik Қырғызстан.
Қазіргі уақытта қақтығыстың себебі анықталып жатыр. Оған екі жақтан 180-ге жуық адам қатысқан.
Оқиға орнына екі жақтан келген шекарашылар, құқық қорғау органдарының қызметкерлері мен облыстық әкімшілік басшылары жанжалды тоқтатты.
Қырғызстанның мемлекеттік шекара қызметінің мәліметінше, келіссөздер барысында тәжік тарапынан оқ атылған. Салдарынан шекарашы жараланды.
«Келіссөздер барысында сағат 11:30-да тәжік тарапынан белгісіз біреулер Қырғызстан азаматтарына тас лақтыра бастады, жауап қайтарылған кезде тәжікстандықтарға тиесілі екі көліктің алдыңғы әйнегі сынған. 20 минуттан кейін тәжік тарапынан, алдын ала мәлімет бойынша, ұсақ калибрлі қарудан оқ атылды. Салдарынан Қырғызстан ІІМ Ішкі әскерлерінің сарбазы жарақат алды», – деп хабарлады Қырғызстанның мемлекеттік шекара қызметінің баспасөз қызметі.
Хабарламада келіссөздердің уақытша тоқтатылғаны, екі елдің билігі жергілікті тұрғындармен түсіндіру жұмыстарын жүргізіп жатқандығы айтылған.
Шекаралас аймақтағы жағдайды тұрақтандыру үшін бас штаб бастығы – ведомство басқарма төрағасының бірінші орынбасары Әбдікәрім Әлімбаев Баткен облысына ұшып кеткен.