Ішкі істер министрлігі шетелдік нөмірі бар көліктерге қатысты позициясын білдірді. Мекеме елімізде жүрген Армения, Қырғыз Республикасы мен Ресей нөмірі бар көліктерді арнайы тіркеу қажет деп санайды. Бүгінде елімізде аталған мемлекеттерден әкелінген 170 мыңнан астам көлік бар. Шетелдік нөмірі бар көліктерді тіркеудің ерекшеліктерін жол полициясы мекемелерінен білуге болады.
Министрліктің деректеріне қарағанда, еліміздегі арнайы құрылғылар шетелдік нөмірі бар көліктердің 2019 жылы жол ережесін шамамен 90 мың мәрте бұзғанын анықтаған. Бұл дегеніңіз шамамен 1,1 млрд теңге көлеміндегі айыппұл. Осыншама айыппұлдың қаншасы өндіріліп алынғаны белгісіз. Ведомствоның баспасөз қызметі шетелдерде есепте тұрған көлікті жүргізген Қазақстан азаматтары 1 884 жол-көлік оқиғасына себепші болып, соның салдарынан 132 адам көз жұмғанын, 500-ден астам адам жараланғанын хабарлады. Сонымен қатар тиісті тәртіпке сәйкес тіркелмеген көлік иелеріне 10 АЕК көлемінде айыппұл салынады, қажет болса, жол полициясы қызметкерлері көліктерді айып тұрағына алып кетуге құқылы. Өйткені Қазақстан азаматтары Қырғыз Республикасында немесе Арменияда тіркелген көліктерді тек кедендік декларациядан өткізіп, тиісті салығын төлеген соң ғана пайдалана алады.