Қазақстанда биылғы жазда зейнетақы жүйесінің реформасы басталады. Бұл жөнінде Премьер-Министр Асқар Маминнің төрағалығымен өткен Үкімет отырысында жария етілді. Жиында ел Президентінің Үкіметтің кеңейтілген отырысында берген тапсырмаларын орындау шаралары байыпталды.
Сол отырыста Мемлекет басшысы әр саланы қамтыған 80-нен астам тапсырма берген екен. Ұлттық экономика министрі Руслан Дәленов оларды іске асыру бойынша іс-шаралар кешенін ұсынды.
Еліміздің бас экономисінің айтуынша, Президенттік тапсырмаларды орындау үшін 1 экономикалық даму жоспарын, 3 бағдарламаны (Ақша-несие саясатының стратегиясы, Сауда саясаты бағдарламасы, Су ресурстарын басқару бағдарламасы), сондай-ақ 3 заңды («Техникалық реттеу туралы» заң, Бюджет кодексіне өзгерістер және Денсаулық кодексі) қабылдау керек.
Мемлекет басшысы қойған міндеттердің орындалуына Үкімет басшысының өзі жауапты болады: Асқар Маминнің төрағалығымен Үкіметте арнайы жұмыс тобы құрылады. Оның аясында тағы 10 шағын топ жұмыс істемек. Бұл топтар Президенттің барлық тапсырмаларын қамтиды. Шағын топтарды министрліктердің бірінші басшылары басқарады және олар дербес жауапкершілік арқалайды.
Біріншіден, салық-бюджет саясаты бойынша міндеттер Ұлттық экономика министрлігіне (ҰЭМ) жүктелді. Бұл бағытта мемлекеттік бюджеттің тұрақтылығы үшін ашық және прагматикалық саясат құру бойынша шаралар әзірленеді. Барлық салықтық преференциялар мен жеңілдіктер талданып, тиімсіздері жойылады.
Екіншіден, ақша-кредит саясаты, қаржы секторы бойынша тапсырмалар Ұлттық банк пен Қаржы нарығын реттеу және дамыту агенттігі мойнында. Олар инфляция мен экономикалық өсу арасындағы үйлесімге қол жеткізуге бағытталған шаралар түзеді. 2020 жылғы 1 шілдеге дейін Ақша-кредит саясаты стратегиясы және хеджирлеу инфрақұрылымын дамыту бойынша ұсыныстар әзірленеді. Қолма-қол ақшасыз есеп айырысуды дамыту және ұлттық төлем жүйесін құру бойынша шаралар қабылданады.
Үшіншіден, мемлекеттік басқару және квазимемлекеттік сектор шараларына да ҰЭМ жауапты. Ол құзыреттілік пен тиімділікті арттыруға және бюрократияны жоюға қатысты шаралар дайындауға тиіс. 1 мамырға дейін нәтижесіз шығыстар қысқартылады, қиындықсыз кейінге қалдыруға болатын шығыстардың тізбесі айқындалады.
Төртіншіден, ҰЭМ нарықты монополиясыздандыру, кәсіпкерлікті, әкімшілік және экономикалық кедергілерді жою, бәсекелестікті дамыту және мемлекет меншігін жекешелендіру бойынша кешенді шараларға жетекшілік етпек. Жеке қолға берілетін нысандар тізімі кеңейтіледі.
Бесіншіден, Ауыл шаруашылығы министрлігі агроөнеркәсіп кешені шикізатын қайта өңдеу және салада мемлекеттік қолдаудың тұрақтылығын қамтамасыз ету үшін барлық жағдай жасауы шарт.
Алтыншыдан, Индустрия және инфрақұрылымдық даму министрлігі АЭА және индустриялық аймақтарды, қайта өңдеу өнеркәсібін тиімді дамыту, еңбек өнімділігін арттыру шараларын қабылдайды.
Жетіншіден, Сауда және интеграция министрлігі Сауда саясаты бойынша бағдарлама әзірлейді. Сегізіншіден, Еңбек және халықты әлеуметтік қорғау министрлігі әлеуметтік саладағы заңнамаға инвентаризация жүргізеді. Биылғы 1 шілдеге дейін зейнетақы жүйесін жаңғырту бойынша тәсілдер мен шешімдер анықталады. Қалған екі бағытта Денсаулық сақтау, Білім және ғылым министрліктері тиісінше медициналық қызметтердің қолжетімділігі мен сапасын арттыру, педагогтер даярлау жүйесін жетілдіру шараларына кіріседі.
Үкімет басшысы инвестицияларды белсенді түрде тарту, шикізаттық емес секторларды, шағын және орта бизнесті дамыту, сонымен бірге жаңа жұмыс орындарын құру – Үкіметтің әрбір мүшесі мен әкімдердің негізгі басымдығы екенін нықтады.
– Мемлекет басшысының тапсырмаларын іске асыру шараларының кешені ұсынылды. Жауаптылар мен орындалу мерзімдері анықталды. Енді үйлесімді жұмысты ұйымдастыру қажет. Президенттің алға қойған барлық міндеттері нақты орындалуы тиіс. Меморгандардың бірінші басшылары дербес жауап береді, – деді А.Мамин.
Ол барлық министрлерге, өңір әкімдеріне және ұлттық компания басшыларына қандай өнімсіз бюджет шығыстарын қысқартатынын анықтап, 1 апта ішінде Қаржы министрлігіне тізім енгізуді тапсырды.
«Қаржы министрі 2 аптадан кейін өтетін Үкімет отырысында бюджет шығыстарын қысқарту бойынша баяндасын», – деп түйді Премьер-Министр.
Айхан ШӘРІП
