Жаңа мыңжылдықтың алғашқы он жылдығы еліміз үшін қалыптасу кезеңі болды десек, одан кейінгі екінші декаданы даму даңғылына қадам басқан дәуір деуге болады. Ішкі саясат та, сыртқы саясат та жаңаша нығайған сапалық сипатта өрілді. Ал жылдың басты жаңалығы – «Мәңгілік ел» идеясының жария етілгені.
Саяси жаңғыру жолында
2012 жыл еліміздегі саяси ахуалдың жаңғыру жолындағы жаңашылдықтарымен ерекше болды. Конституцияға көппартиялық туралы енгізілген өзгерістерге сәйкес Мәжілістің таратылуына байланысты, Мәжіліс пен мәслихаттар депутаттарының сайлауы осы жылғы 15 қаңтарға белгіленген болатын. Осы саяси додада халық дауысының 80,74%-ын жинаған «Нұр Отан» партиясы халық сенімінің деңгейін кезекті рет дәлелдеді. Осылайша, Мәжілістегі орынның басым бөлігін билік партиясы алып, одан кейінгі орындарға «Ақ жол» мен Қазақстанның халықтық коммунистер партиясы ие бола алды. Сайлаудан соң өткен жеңімпаздар форумында «Нұр Отан» партиясының Төрағасы Нұрсұлтан Назарбаев осы уақытқа дейінгі мемлекеттік саясаттың халықтың көңілінен шыққанына жоғары баға беріп, дауыс беру арқылы сенім білдірген барша сайлаушыларға алғысын жеткізді. «Құрметті отандастар! Бұл – біздің ортақ жеңісіміз, барша Қазақстан халқының жеңісі. Дауыс берудің қорытындылары қазақстандықтардың елімізді дамытуға, экономика мен саясатты жаңғыртуға, азаматтардың әл-ауқатын жақсартуға арналған біздің бағытымызды қолдайтынын білдіреді. Халық қоғамдағы бірлік, өзара түсіністік пен толеранттылық үшін, партияның нақты ісі мен бағдарламасы үшін дауыс берді», – деді Елбасы. Осылайша, 2012 жыл саяси жаңғыру жылына айналып, Қазақстанда көппартиялы Парламент жұмысына кірісті.«Қазақстан-2050»: «Мәңгілік ел»
2012 жыл Елбасы Нұрсұлтан Назарбаевтың Қазақстан халқына екі рет Жолдау арнағанымен есте қалмақ. Жыл басында, яғни 27 қаңтарда ол «Әлеуметтік-экономикалық жаңғырту – Қазақстан дамуының басты бағыты» атты Жолдауын жариялаған болса, жыл соңында, яғни 14 желтоқсанда «Қазақстан-2050» стратегиясы – қалыптасқан мемлекеттің жаңа саяси бағыты» деп аталатын жаңа құжатпен таныстырды. Оның басты мақсаты – мықты мемлекеттің, дамыған экономиканың және жалпыға ортақ еңбектің негізінде берекелі қоғам құру, Қазақстан әлемнің ең дамыған 30 елінің қатарында болуы. Бұл мақсаттарға қол жеткізу үшін «Қазақстан-2050» стратегиясы жеті ұзақмерзімді басымдықтарды іске асыруды қарастырады. Олар: 1. Жаңа бағыттың экономикалық саясаты – пайда алу, инвестициялар мен бәсекеге қабілеттіліктен қайтарым алу принципіне негізделген түгел қамтитын экономикалық прагматизм. 2. Кәсіпкерлікті – ұлттық экономиканың жетекші күшін жан-жақты қолдау. 3. Әлеуметтік саясаттың жаңа принциптері – әлеуметтік кепілдіктер және жеке жауапкершілік. 4. Білім және кәсіби машық – заманауи білім беру жүйесінің, кадр даярлау мен қайта даярлаудың негізгі бағдары. 5. Мемлекеттілікті одан әрі нығайту және қазақстандық демократияны дамыту. 6. Дәйекті және болжамды сыртқы саясат – ұлттық мүдделерді ілгерілету мен аймақтық және жаһандық қауіпсіздікті нығайту. 7. Жаңа қазақстандық патриотизм – біздің көпұлтты және көпконфессиялы қоғамымыз табысының негізі. Осы жиында ұлт Көшбасшысы Н.Назарбаев қазақстандықтарды бірлікте болуға шақырып, «бәріміздің де туған жеріміз біреу, ол – қасиетті қазақ даласы» екеніне маңыз берді. Тұңғыш рет «Мәңгілік ел» идеясы ұсынылды. «Мәңгілік ел» ұғымы ұлтымыздың ұлы бағдары – «Қазақстан-2050» стратегиясының түп қазығы етіп алынғанын алға тартты. «Мәңгілік ел» ата-бабамыздың сан мындаған жылдар бойғы асыл арманы екені баршамызға белгілі. Ол арман – әлем елдерімен терезесі тең, әлем қатынасынан ойып тұрып орын алатын тәуелсіз мемлекет атану еді, ол арман-тұрмысы бақуатты, түтіні түзу шыққан, ұрпағы ертеңіне сеніммен қарайтын бақытты ел болу. Біз бұл армандарды ақиқатқа айналдырдық. Мәңгілік елдің іргесін қаладық. Мен қоғамда «қазақ елінің ұлттық идеясы қандай болуы керек?» деген сауалдың жиі талқыланатынын естіп жүрмін. Біз үшін болашағымызға бағдар ететін, ұлтты ұйыстыра ұлы мақсаттарға жетелейтін идея бар. Ол – Мәңгілік ел идеясы», – деп атап өтті Елбасы.Дінмұхамед Қонаевтың туғанына – 100 жыл
12 қаңтарда Алматыдағы Абай атындағы опера және балет театрында Алаштың ардақтысы, халқымыздың біртуар перзенті, аса көрнекті мемлекет және қоғам қайраткері Дінмұхамед Қонаевтың туғанына 100 жыл толуына арналған салтанатты жиналыс болып өтті. Оған Елбасы Нұрсұлтан Назарбаев қатысып, есімі елге қадірлі ерен тұлға хақында сөз сөйледі. «Дінмұхамед Ахметұлын үлкен ішкі мәдениеті, терең білімдарлығы мен мол өмірлік тәжірибесі ерекшелеп тұратын. Ол өзіне біздің халқымыздың, сол уақыттағы қазақ зиялыларының ең жақсы қасиеттерін сіңіре білді. Оны тәуелсіздікке дейінгі тарихымыздың тегеурінді тұлғасы деп бағалауымыз қажет», – деді Нұрсұлтан Назарбаев. Мерейтойлық іс-шара осы күні Д.Қонаевтың пәтер-мұражайының ашылуымен басталған болатын. Ол бұған дейін жұмыс істеп келген Д.Қонаев мұражай-үйінің жәдігерлік бөлімінің жалғасына айналды. Одан соң тарихи тұлғаның ескерткішіне гүл шоғын қою рәсімі жасалды. Ал осыдан бір апта бұрын Д.Қонаев туралы фотоальбомның тұсаукесері өткен болатын.«Мәңгілік ел» ата-бабамыздың сан мындаған жылдар бойғы асыл арманы екені баршамызға белгілі. Ол арман – әлем елдерімен терезесі тең, әлем қатынасынан ойып тұрып орын алатын тәуелсіз мемлекет атану еді, ол арман-тұрмысы бақуатты, түтіні түзу шыққан, ұрпағы ертеңіне сеніммен қарайтын бақытты ел болу.
100 жылдыққа арналған іс-шаралар жыл бойы еліміздің барлық өңірлерінде жалғасты. Мәселен ақпан айында Астанада «Дінмұхамед Қонаев және оның дәуірі» атты республикалық ғылыми-практикалық конференция ұйымдастырылды. Соның ізімен жер-жерлерде көптеген жиын өткізіліп, ескерткіші ашылды. Бұдан бөлек, «Қазақфильм» киностудиясы, «Хабар» агенттігі мен Солтүстік Қазақстан облыстық телестудиясында 3 деректі фильм түсірілді. Осы жылы «Қазпошта» АҚ-ның «Мерейтойлар, ұмытылмас даталар және мейрам күндері» сериясы аясында мерейтойлық пошта маркасы айналымға енді. 50 000 таралыммен жарық көрген марка төрт бояулы, офсетті тәсілмен басылған, перфорациясы – жоталы: 28 х 40 мм, номиналы 100 теңге. Маркада қайраткердің суреті бейнеленген. Авторы – суретші Данияр Мұхамеджанов. Марка «Қазпошта» АҚ топтамасындағы 766-пошталық марка болып табылады. Сондай-ақ осы жылы Дінмұхамед Қонаевтың суреті бедерленген номиналы 500 теңгелік монета айналысқа шығарылды. Ақша құралы 5 000 дана таралыммен шығарылған.ЕҚЫҰ-дан кейінгі қос төрағалық
2010 жылы еліміз Еуропадағы қауіпсіздік және ын¬тымақтастық ұйымына төрағалық еткен соң халықаралық деңгейдегі мәртебесі де арта түскен болатын. 2012 жылы Қазақстан тағы да қос бірдей ұйымның төрағалық тізгінін қолға алды. Олар – Ұжымдық қауіпсіздік туралы шарт ұйымының Жарғылық органдары мен Ислам ынтымақтастық ұйымы еді. ҰҚШҰ-ның негізгі мақсаттары – бейбітшілікті, халықаралық және өңірлік қауіпсіздік пен тұрақтылықты нығайту, ұжымдық негізде мүше мемлекеттердің тәуелсіздігін, аумақтық тұтастығы мен егемендігін қорғау. 1992 жылғы 15 мамырдағы Ұжымдық қауіпсізді туралы шарттың негізінде 2002 жылы құрылған ұйымның құрамында Қазақстан, Ресей, Беларусь, Армения, Қырғызстан және Тәжікстан мемлекеттері бар. Еліміздің осы жылғы ҰҚШҰ-ның Жарғылық органдарына төрағалық ету кезеңіндегі басымдықтарын іске асыру барысында «2015-2020 жылдарға арналған ҰҚШҰ-ға мүше мемлекеттердің есірткіге қарсы стратегиясы» қабылданды. Бұл құжатта ірі есірткі дилерлерін және олардың билік құрылымдарымен байланыстарын анықтау, жеткізу арналарын жабу бойынша бірлескен жедел іс-шараларды өткізу қарастырылған. Осы жылы 15 мамырда Елбасы Нұрсұлтан Назарбаев Мәскеуде болған Ұжымдық қауіпсіздік туралы шарт ұйымы Ұжымдық қауіпсіздік кеңесінің сессиясына қатысты. Ал Ислам ынтымақтастығы ұымы – ең ірі және ықпалды үкіметтік әрі халықаралық мұсылман ұйым. 2011 жылғы 28-30 маусымда Қазақстан астанасында Ислам ынтымақтастығы ұйымы (ИЫҰ) Сыртқы істер министрлері кеңесінің (СІМК) 38-сессиясы өткен болатын. Сол сәттен бастап Қазақстан осы халықаралық ұйымға төрағалық етуге кірісті. Бұл жиынды тарихи оқиға деп атауға болады, өйткені онда Ислам конференциясы ұйымы өз атауын Ислам ынтымақтастығы ұйымы деп өзгерту туралы шешім қабылданды. Адам құқықтары жөніндегі тұрақты комиссия құрылып, алғаш рет ИЫҰ-ның Орталық Азиямен ынтымақтастық жөніндегі іс-әрекет жоспары қабылданды. Қазақстан төрағалығы кезінде ислам әлеміндегі күрделі геосаяси ахуалға байланысты ИЫҰ-ның атқару комитетінің Сирия мен Ливиядағы дағдарысты реттеуге арналған төтенше отырысы өтті. Сомалидегі гуманитарлық апатты еңсеру, исламофобиямен күрес және дінаралық қақтығыстардың алдын алу мәселелері ұйым назарына алынды. Еліміздің бастамасын қолдау арқылы өткізілген кең ауқымды науқан аясында Сомали үшін жалпы мөлшері 500 миллион доллардан астам қаржы жинақталды. Сондай-ақ Қазақстан ұйымның Сауда және экономикалық ынтымақтастық жөніндегі тұрақты комитеті төрағасының орынбасары болып сайланды. Бұл комитет – ұйымға мүше мемлекеттер арасында сауда-экономикалық өзара әрекеттестікті жүзеге асыруға жауапты басты орган. Нәтижесінде, Қазақстан 2012 жылдың көрсеткіштері бойынша ұйымға мүше елдердің 40-тан астамымен сауда, көлік, туризм, қаржы салаларына бағытталған экономикалық ынтымақтастық орнатты. Еліміздегі 10 мыңға жуық кәсіпорынның 2,6 мыңы ұйымға мүше 28 мемлекет пен Қазақстан арасында құрылған бірлескен кәсіпорындар болды.Лондон Олимпиадасындағы олжа
2012 жыл – төртжылдық додасы Олимпиада жылы болды. Лондон қаласында 27 шілде мен 12 тамыз аралығында өткен ХХХ жазғы Олимпиада ойындарына Қазақстаннан 25 спорт түрінен 115 спортшы қатысты. Бұл еліміздің бес шығыршықты сайыстарға бесінші рет қатысуы еді. Ұлыбритания қазақстандық спортшылар ең жеңісті өнер көрсеткен алаң болды. Лондонда Қазақстан 7 алтын, 1 күміс, 5 қола медаль жеңіп алып, алқаларының саны бойынша жалпы есепте 204 елдің арасынан 12-орынға тұрақтады. Серік Сәпиев (бокс), Илья Ильин (ауыр атлетика), Александр Винокуров (велоспорт), Зүлфия Чиншанло (ауыр атлетика), Майя Манеза (ауыр атлетика), Светлана Подобедова (ауыр атлетика), Ольга Рыпакова (жеңіл атлетика) Олимпиада чемпиондары атанса, Әділбек Ниязымбетов (бокс) күміс алқа иеленді. Ақжүрек Таңатаров (еркін күрес), Гузель Манюрова (еркін күрес), Даниял Гаджиев (грек-рим күресі), Марина Вольнова (бокс), Иван Дычко (бокс) қола жүлдені иемденді.EXPO-дағы жеңіс
22 қарашада EXPO Халықаралық көрмелер бюросы Бас ассамблеясының Парижде өткен 152-сессиясында EXPO-2017 халықаралық көрмесі Астана қаласында өтетін болып шешілді. ХКБ-ға мүше 161 мемлекеттің жасырын дауыс беруі нәтижесінде Астананы 103 ел қолдап шықты. Көрмені өткізуге Қазақстанмен қатар кандидатураларын тіркеткен Бельгия (Льеж қаласы) таласқан еді. Еліміз бұл көрмеге энергияның балама көзіне және «жасыл» технологияға арналған «Болашақ энергиясы» атты тақырыпты ұсынған болатын. Естеріңізде болса, 2017 жылы EXPO Дүниежүзілік көрмесін өткізуге үміттеніп отырған Астананың кандидатурасын қолдау үшін түсірілген Astana Expo –2017. Great Expectation of Kazakhstan атты Қазақстан фильмі қазан айында Каннда өткен халықаралық фестивальде марапатқа ие болған еді.Нұрлан ҚОСАЙ