Түркияда Тәуелсіздіктің 30 жылдығына орай «Жаһандану өркениетіндегі қазақ әлемі» тақырыбында Қазақтардың кіші құрылтайы өтті.
Кіші Құрылтайды Ақпарат және қоғамдық даму министрлігінің қолдауымен «Отандастар қоры» Дүниежүзі қазақтары қауымдастығымен бірлесіп ұйымдастырды. Қазақтардың кіші құрылтайының жұмысына Түркия мен Еуропа елдеріндегі қазақ қауымдастықтарының, Қазақстанның мәдениет мекемелері мен жоғары оқу орындарының 100-ден астам өкілі қатысты. Іс-шара аясында шетелдегі қазақ диаспораларының өзекті мәселелері бойынша нәтижелі пікір алмасу болды. Айталық, Кіші құрылтайдың бағдарламасы көптеген мәдени-ағарту іс-шарасын қамтыды. Стамбұл қаласының Бағдылжар ауданында белгілі спортшы Мұстафа Өзтүрік атындағы саябақтың ашылу салтанаты өтті. Кіші құрылтайға қатысушылар үшін қазақстандық музейлер мен жоғары оқу орындары «Алтын тамырлы Атажұрт» көрмесі, сондай-ақ Түркиядағы қазақ диаспорасының жастары үшін «Білім көрмесінің» тұсаукесері ұйымдастырылды. Сондай-ақ шетелдік іскер қазақ қауымдастығымен кездесу барысында «Алыстағы ағайын» деректі фильмі көрсетілді. Казақтардың кіші құрылтайы іс-шаралар бағдарламасы аясында Қарағанды облысынан келген Тәттімбет Қазанғапұлы атындағы академиялық қазақ халық аспаптар оркестрінің қатысуымен гала-концерт ұйымдастырылды. Іс-шараның қорытындысы бойынша қазақстандық тарап Кіші құрылтайға қатысушыларға қазақ елінің мәдениеті, тарихы, Қазақстандағы қазіргі өмір туралы әдебиеттерді сыйға тартты.А. АЙДАРҚЫЗЫ