Өңірде 50-ден астам этностар мен этностық топтардың өкілдері тұрады. Аталған бірлестіктердің басын біріктіріп, бейбіт өмірде тіршілік етуге, сондай-ақ, олардың өзара тығыз қарым-қатынас жасап тұруы үшін өңірде 11 этномәдени бірлестік және аудандар мен қалаларда 7 филиал және 14 өкілдік жұмыс істейді. Бұл туралы Қазақстан халқы ассамблеясы Төрағасы орынбасарының Түркістан облысына іссапарында ассамблеясының облыстық құрылымдары және этномәдени бірлестіктердің жетекшілерімен кездесуі барысында белгілі болды.
Түркістан қаласында Қазақстан халқы ассамблеясы Төрағасының орынбасары Марат Әзілханов Түркістан облысы ассамблеясының құрылымдары және этномәдени бірлестіктердің жетекшілерімен кездесті. Іс-шараға Түркістан облысы әкімінің орынбасары Сәкен Қалқаманов, Қазақстан Республикасы Ақпарат және қоғамдық даму министрлігі Этносаралық қатынастарды дамыту комитетінің төрағасы Ғалым Шойкин және жергілікті атқарушы органдардың өкілдері қатысты.
Шараны облыс әкімінің орынбасары Сәкен Қалқаманов ашып, жүргізіп отырды.
Кездесуде Мемлекет басшысының «Халық бірлігі және жүйелі реформалар – ел өркендеуінің берік негізі» Жолдауын іске асыруда облыстық Қазақстан халқы ассамблеясының атқаратын қызметі, сондай-ақ өңірдегі этносаралық келісімді нығайту жөніндегі алдағы шаралар талқыланды.
Түркістанның және облыстың дамуы ел басшылығының ерекше бақылауы мен жіті назарында. Түркістан өлкесі – түркі әлемінің киелі жері, ал Түркістан қаласы – оның мәдени және рухани астанасы, қазақ ұлтының қалыптасуының тарихи орталығы.
«Мемлекет басшысы күн тәртібіне этносаралық қатынастар саласындағы басты міндет – Қазақстанның көпэтносты халқын болашағы біртұтас ұлтқа біріктіру міндетін қойды. Болашағы біртұтас ұлт қандай болады? Болашағы біртұтас ұлт – мемлекеттік қазақ тілі этносаралық қатынас тілінің рөлін атқаратын азаматтық қауым. Ал қазақстандық патриотизм мен азаматтық қауым елдің барша этностары мен азаматтарының этностық және діни наным-сеніміне қарамастан біртұтас біріктіруші қағидатқа айналады», – деп атап өтті Марат Алмасұлы.
Сонымен қатар ҚХА Төрағасының орынбасары Сауран ауданының этномәдени бірлестіктері мен жергілікті атқарушы органдардың өкілдерімен кездесті. Іс-шарада этносаралық өзара іс-қимылды нығайту мәселелері талқыланып, этносаралық қатынастарға ықпал ететін нақты әлеуметтік мәселелерді шешуге баса назар аударылды.
Айта кетейік, Түркістан облысы халқының құрамы саналуандығымен ерекшеленеді, өңірде 50-ден астам этнос пен этностық топтардың өкілдері тұрады.
Жалпы облыста 11 этномәдени бірлестік (өзбек, славян, түрік, күрд, иран, тәжік, шешен-ингуш, татар-башқұрт, әзербайжан, грек және «Ынтымақ» этносаралық этномәдени бірлестігі) бар, аудандар мен қалаларда 7 филиал және 14 өкілдік жұмыс істейді.
