Түркістан облысындағы 151 ауылда ұялы байланыс жоқ. Сондай-ақ өңір аумағын басып өтетін республикалық, облыстық автожолдардың көпшілік учаскелері ұялы байланыспен қамтылмағандықтан, жол жүрген жолаушының телефонмен тілдесуі мүмкін емес. Тұрғындар аталған жайсыздықтарды айтып құзырлы органдарға жиі шағымданатын.
Енді осы мәселені тергеп-тексеру үшін «Nur Otan» партиясы Түркістан облыстық мәслихатындағы фракциясы жанынан арнайы жұмыс тобы құрылды. Жұмыс тобы құрамына енген облыстық мәслихат депутаттары, байланыс операторлары, жауапты басқарма өкілдері күрмеуі қиын проблеманы шешудің жолдарын қарастыру үшін арнайы отырыс өткізді. Жиынды «Nur Otan» партиясы Түркістан облыстық филиалы төрағасының бірінші орынбасары, фракция жетекшісі Бейсен Тәжібаев жүргізіп отырды. Мақсат – проблемаларды айқындап, шешу жолын қарастыру, тиісті басқарма мен жауапты мекемелерге ұсыныс беру. Жиында Түркістан облысының Цифрландыру, мемлекеттік қызметтер көрсету және архивтер басқарма басшысының орынбасары Ерлан Янабаевтың хабарламасы тыңдалды. Оның айтуынша, облыстағы 838 елді мекеннің 481-інде, яғни 57,3 пайызында 3G және 4G мобильді интернеттері бар. Ал 206 ауылдық елді мекен 2G жүйесіне қанағат білдірсе, 151 ауылда (18,1%) ұялы байланыспен қамтылмаған. Облыстағы 6 596 шақырымға жететін республикалық, облыстық, аудандық және қалалық маңызы бар автожолдардың 3 400 шақырымында ұялы байланыс нашар немесе мүлдем жоқ. «Облыс аумағында ұялы байланыс операторлары ұсынатын қызметтер өңір халқының қажеттіліктеріне жауап бермейді. Цифрлық даму, инновациялар және аэроғарыш өнеркәсібі министрлігі мен байланыс операторлары арасындағы меморандум шеңберінде 2020 жылдың соңына дейін «Кселл» акционерлік қоғамы тарапынан 250-ден астам тұрғыны бар 80 ауылдық елді мекендерді 3G немесе 4G стандартты мобильді интернетпен қамтамасыз ету жүктелген болатын. Алайда 58 елді мекен ғана мобильді кеңжолақты қолжетімділікпен қамтылды», – дейді Ерлан Янабаев. Ол, сондай-ақ ауыл тұрғындарына мобильдік интернеттен бөлек, жоғары жылдамдықты интернетпен қамтамасыз ету мақсатында қолға алынған жұмыстарды баяндады. Одан бөлек, Телекоммуникациялар комитетінің Шымкент қаласы және Жамбыл, Түркістан, Қызылорда облыстары бойынша өңіраралық байланыс инспекциясының басшысы Ержан Тоқтағұлов пен өзге де жауапты мекеме өкілдерінің хабарламалары тыңдалды. Облыстық мәслихат депутаттары тұрғындар сапалы интернетке мұқтаж болып отырғанын айтып, мәселені жедел шешу керегін жеткізді. Жиын қорытындысы бойынша фракция мүшелері мен байланыс саласына жауапты мекеме өкілдерінен құралған жұмысшы топ Түлкібас ауданындағы Састөбе кенті мен Келтемашат ауыл округінде болып, ұялы байланыс сапасын тексеруден өткізді. Сондай-ақ алдағы уақытта бекітілген жоспарға сай облыстағы 30-ға жуық елді мекенге барып, байланыстың сапасын тексереді. Еске сала кетейік, Қазақстанда алғашқы болып Түркістан облысында «Қазақтелеком» және «Транстелеком» акционерлік қоғамдары тарапынан мемлекеттік-жекешелік әріптестік жобасы бойынша талшықты-оптиканы пайдалану жобасы іске асырыла бастаған. «Nur Otan» партиясы Түркістан облыстық мәслихатындағы фракциясы интернетпен қамтумен қатар, өңірдегі карьерлерді заңсыз пайдаланушылардан қорғау мәселесін де бақылауға алған болатын. Облыс аумағында кең таралған пайдалы қазбаларды өндіруге жалпы 110 келісімшарт және 38 лицензия берілген. Облыстық инвестиция және экспорт басқармасы заңсыз жер қойнауын пайдалану фактілерін болдырмау және алдын алу мақсатында келісімшарт, лицензия аумақтарына зерделеу жұмыстарын жүргізген. Нәтижесінде, облыс аумағында жалпы келісімшарт міндеттемелерін толық орындамағаны үшін 18 келісімшарт және 4 лицензияның күші мерзімінен бұрын тоқтатылған. Облыстық және аудандық мәслихат депутаттары құзырлы өкілдерімен бірлесіп, бірнеше аудан, қалада карьерлерге мониторинг жүргізді. Ол жұмыстар жалғасады. Анықталған құқықбұзушылықтар бойынша құқық қорғау органдарына ұсыныс беріліп, тиісті шешім қабылданады.Би-Барыс КӨКШЕ