– Альбина орталыққа алғаш келгенде өзінің зеректігімен, ашық-жарқын мінезімен ерекшеленді. Кез келген ортада тез тіл табысып, өзін еркін ұстай біледі. Берілген тапсырманы жауапкершілікпен атқарады. Бүгінде орталығымызда балалардың дамуына арналған үйірмелерде көзге түсіп жүр. «Мейірім» жобасына енгенін Альбина ерекше қуанышпен қабылдады. Ел ағалары жандандырған бастамаға айтар алғысым шексіз, – дейді тәрбиеші.Ал 14 жасар Альбина өткен күннің өлшемінде өзегін өртеген оқиғаларды ерекше толғаныспен еске алды. Әсіресе, анасының мейірімді жүзі жиі елес береді екен. Өзегін кернеген өкінішін үнсіз жұтып, балалық шағының ең шуақты күндері отбасымен бірге тойлаған туған күнін сағынатынын, анасы дүниеден өткеннен кейін өмірі күрт өзгергенін айтып егілді. Жаңа ортаға үйрену 8 жасар бүлдіршінге оңай тимегені анық. Ол айдың сәулесі мен күннің шуағынан да анасының мейірбан жүзін елестетіп, әне-міне келіп қалардай әлі күнге үмітін сөндіре алмай жүр. Бірақ «Мейірім» жобасын жандандырып, қамқорлығына алған облыс әкімінің аялы алақаны жарқын болашағына бағдаршам болатынына сенеді.
– Тәрбиеші аналарымның қолдауы мен жылы сөздерінің арқасында мен бұл орталыққа тез бейімделдім. Жақсы білім мен тәрбие алып жатырмын. Орталықта барлық тәрбиеленушінің дамуына арналған үйірмелер жұмыс істейді. Мен «Балауса» би үйірмесіне қатысқанды жақсы көремін. Биге біраз шыңдалып та қалдым. Халықаралық, республикалық, облыстық байқаулардың жүлдегері атандым. 2019 жылы Тараз қаласында өткен «Мисс Тараз» байқауына қатысып, «FABUS Ханшайымы» номинациясын жеңіп алдым. 2020 жылы Бурятия Республикасында онлайн форматта ұйымдастырылған халықаралық би байқауында бағымды сынап, екінші орынды иелендім. Мені қамқорлығына алған тәлімгерім – облыс әкімі Бердібек Сапарбаевқа алғысым шексіз. Болашақта еліміз бен ел ағаларының жасаған жақсылығын еселеп қайтаратын боламын. Ол үшін мен білім алып, өз біліктілігімді дәлелдеймін, – дейді Альбина.Өмірлік қиын жағдайдағы балаларды қолдау орталығының директоры Айжан Мейірханова «Мейірім» жобасына олардың 56 тәрбиеленушісі енгенін айтады. Осы балалардың есепшотына тәлімгерлері 1 миллион теңге көлемінде ақша аударып, мереке сайын сый-сияпатпен де қуантады. Сондай азаматтың бірі – «Әскерилендірілген теміржол күзеті» акционерлік қоғамының Тараз қаласы филиалының басшысы Еркін Мусилимов. Тәлімгер Есімжан Шәбден есімді баланы қамқорлығына алған. Еркін Есімжанның туған күнінде, атаулы мерекелерде үнемі құттықтап, қуанышын бөлісуді дәстүрге айналдырған. Сонымен қатар атымтай жомарт азамат Есімжанның болашақта оқуға түсуіне және оқу бітіргеннен кейін жұмысқа орналасуын да өз мойнына алыпты. Ал Есімжан мемлекетке, тәрбиелеген тәрбиешілерге және қамқорлық танытқан тәлімгерінің жақсылығын өзінің жеткен жетістігімен қайтаруды басты парызы санайтынын айтады. Дәл қазір Өмірлік қиын жағдайдағы балаларды қолдау орталығында бірнеше ұлттың балалары тәрбиеленіп жатса да барлығы тату. Бір үйдің баласындай бір-біріне жанашыр, қамқор. Иә, «Мейірім» жобасы балғындарға мейірімін төккені анық. Мұндай сауапты игі бастама көпке үлгі екені даусыз. Оған қоса, «балам» деп басын сипайтын елі барда, «елім» деп еміреніп, ел ертеңін ойлайтын ұрпақ өсетіні айқын. «Мейірім» жобасы сонысымен де құнды.
Саятхан Сатылған, Жамбыл облысы