Сенат Төрағасы Мәулен Әшімбаевтың төрағалығымен өткен палата отырысында алдағы үш жылға арналған республикалық бюджет жобасы және «Ұлттық қордан 2022-2024 жылдарға арналған кепілдендірілген трансферт туралы» заң жобасы қаралды. Құжаттар пандемия салдарын еңсерудің жалпыұлттық басымдықтарын іске асыруға және Президент Қ.Тоқаев қойған міндеттерді орындауға бағытталған.
«Қазақстанда пандемия салдарын еңсеруге басымдық берілгені белгілі. Мемлекет басшысының тапсырмасымен азаматтарымыз бен зардап шеккен кәсіпорындарға әлеуметтік қолдау көрсетуге қомақты қаражат жұмсалуда. Жағдай әлі де болса оңай емес. Бірақ Қазақстан пандемия дағдарысын еңсеріп келеді. Сондықтан алдағы үш жылдың бюджеті негізінен қайта қалыпқа келуге және дамуға бағытталып отыр», – деді Сенат Төрағасы.
Бюджеттің маңызды міндеттерінің бірі – мемлекеттің азаматтар алдындағы әлеуметтік міндеттемесін мүлтіксіз орындау. Сәйкесінше, бюджет шығыстарындағы ең үлкен үлес әлеуметтік салаға тиесілі. Сенаторлар талқылау барысында инфляцияның өсуіне, отын бағасына, мемқарыздың ұлғаюына, ауыл тұрғындарын таза ауызсумен, интернетпен жабдықтауға, фельдшерлік пункттер желісін кеңейтуге қатысты бірқатар өзекті мәселені көтерді. Олар республикалық бюджет жобасына түзетулер енгізді. Атап айтқанда, автожолдарды жаңартуға, газбен жабдықтауға, су құбыры желілерін салу мен жөндеуге және басқасына шығыстарды ұлғайту ұсынылып отыр. Бұл шығыстарды Үкімет резерві қаражатын қайта бөлу есебінен қаржыландыру көзделген.
Түзетілуіне байланысты «2022-2024 жылдарға арналған республикалық бюджет жобасы» Мәжіліске қайтарылды. Ал Ұлттық қордан кепілдендірілген трансферт алуды көздейтін заң өзгеріссіз қабылданып, Президенттің қол қоюына жолданды.
