«Nur Otan» партиясының «Өзгерістер жолы: әр азаматқа лайықты өмір!» атты 2021-2025 жылдарға арналған Шымкент қаласының сайлауалды бағдарламасын іске асыру бойынша әзірленген Жол картасында инфрақұрылымды дамыту мәселесі айрықша көрсетілген.
Шымкентте биыл елді мекендерді сапалы ауызсумен қамту бағытында 14 нысанның құрылысы жүргізілді. Оның 11-і – ішкі орамдық жүйе, үшеуі – 30 шақырымды құрайтын магистралды құбыр. Нәтижесінде, Тұран, Асар-2, Солтүстік саяжай, Ынтымақ-2, Батыс, Жаңатұрлан және Ақтас-2, Жаңаталап, Сәуле (276 орам) және Нұртас елді мекенінде ауызсу мәселесі түбегейлі шешілді. Енді жыл соңына дейін сумен жабдықтау көрсеткішін 98 пайызға, ал қаланың даму жоспары бойынша 2023 жылы 100 пайызға жеткізу көзделген.
Сонымен қатар биыл құбыр тарту жұмысы басталған Құрсай шағынауданындағы құрылысты келер жылы аяқтап, пайдалануға беру жоспарланған. Қайнарбұлақ пен Сайрам тұрғын алабында ауызсумен қамту құрылысы 2022 жылы жүргізілетін болды.
Сондай-ақ Жол картасында белгіленген жоспар бойынша Шымкент қаласының Байтұрсынов көшесі №86 және №87 үйлердің аулалары толық абаттандырылып, пайдалануға берілді. Аталған аулалардың ашылу салтанатына мәслихат депутаты, фракция мүшесі Наргиза Керімбаева мен Әл-Фараби аудандық филиалы «Оңтүстік» бастауыш партия ұйымының төрағасы Мұхтар Ахтаев қатысты.
– Бүгін Байтұрсынов көшесінің №86 үй ауласындағы спорт алаңын халық игілігіне тапсырып тұрмыз. Ал балалар ойын алаңы былтыр қолданысқа берілген болатын. Сондай-ақ №87 үйдің ауласы толығымен абаттандырылды. Саламатты өмір салтын ұстану үшін барлық жағдай жасалған. Онда да балалар және спорт алаңшалары, демалуға арналған бастырма, орындықтар, қоқыс жәшіктері және ойын элементтері орнатылды. Ересектер үшін воркаут аймағы бар,– деді Наргиза Керімбаева.
Аудан аулаларында көріктендіру жұмыстары бекітілген мерзімінен бұрын аяқталып, тұрғындарды қуантуда.
