Қарағанды облысында қиын-қыстау кезеңде 86 құқық бұзушылық тіркелген. Ал төтенше жағдай жарияланған уақыттан бастап полиция бөлімдеріне 128 адам жеткізілді.
Қазақстан Президентінің «Төтенше жағдай енгізу туралы» Жарлығы негізінде Қарағанды облысында комендатураның Жедел штабы құрылды. «Өңірде құқықтық тәртіпті қамтамасыз ету үшін барлық полиция қызметкерлері, Ұлттық ұлан мен Қазақстан Қорғаныс министрлігінің әскери қызметкерлері қызметтің күшейтілген режиміне көшірілді. Облыстың елді мекендерінен кіріп-шығатын аумақтарына бақылау бекеттері орналастырылды», – дейді Қарағанды облысының коменданты Ерлан Файзуллин.
Төтенше жағдай жарияланған кезден бастап полиция бөлімдеріне 128 адам жеткізілген. Сонымен қатар Қазақстан Әкімшілік құқықбұзушылық кодексінің 476-бабы, яғни «Төтенше жағдай режимін бұзу» бойынша 86 құқықбұзушылық анықталды. Аталған баптың санкциясына сәйкес, 10 АЕК көлемінде айыппұл салуды немесе 10 тәулікке дейін әкімшілік қамаққа алу көзделген.
Төтенше жағдай кезеңінде тіркеуден өткен қарудың өзін тасымалдауға және алып жүруге тыйым салынған. Полиция қызметкерлері қызметтік міндеттерін атқару кезінде тіркеуде тұрған 3 аңшы мылтығымен 1 пневматикалық тапаншаны тәркіледі.
Бақылау бекетінен өтпек болған Қазақстан Республикасындағы тіркеу мерзімі өтіп кеткен 30 жастағы Өзбекстан азаматы ұсталды. Сондай-ақ өткен жылдың 24 желтоқсанынан бері із-түзсіз жоғалған деп саналған 30 жастағы Қарағанды қаласының тұрғыны бекеттен өту барысында анықталды.
«Қарағанды облысының Полиция департаменті, полиция қызметкерлерінің жұмысына түсіністікпен қарайтын тұрғындарға алғысын білдіріп, азаматтардан төтенше жағдайдың барлық талаптарын орындауды сұрайды», – дейді комендант Ерлан Файзуллин.
Сонымен қатар Алматы және басқа да оңтүстік өңірлерде құқық қорғау органының қызметкерлерімен заңға қайшы әрекет жасаған және тонаумен айналысқан азаматтарды ұстау шаралары жүргізілуде. Осыған байланысты Қарағанды облысының полицейлері де өңірде осындай тұлғаларды анықтау бойынша кешенді іс-шаралар жүргізуде. «Сондықтан да облыс тұрғындарынан барлық күдік тудыратын сәттер бойынша қырағылық танытып, бірден 102 телефонына хабарласуларын сұраймыз», – дейді Ерлан Файзуллин.
