Нұр-Сұлтанда «Айтыс ақындары мен жыршы, термешілердің халықаралық одағы» республикалық қоғамдық бірлестігінің қалалық филиалының салтанатты ашылу рәсімі өтті. Бұдан былай бас қаланың сөз зергерлері сол жақ жағалаудағы Жазушылар үйі ғимаратында алдағы жоспарларын талқылап, дайындық өткізе алады. Айтыскерлерге арналған филиал Nur Otan партиясы мен Нұр-Сұлтан қаласы әкімдігінің қолдауымен ашылып отыр. Айтулы жиынға Мәдениет қайраткері, ақын Жүрсін Ерман мен елімізге танымал айтыскерлер, зиялы қауым және Nur Otan партиясының өкілдері қатысты.
Айтыс – қазақ елінің бағзыдан бергі көнермес мұрасы. Халқымыз үшін ғана емес, адамзат үшін де бағалы өнер. Оған дәлел – ежелгі Римде математикалық айтыс түрінің болғаны. Жарты ғасырға жуық айтыс өнерін дәріптеуде еңбегі сіңген, бүгінде жұртшылық «айтыскерлер атасы» деп құрметтейтін Жүрсін Ерман салтанатты рәсімде филиалдың маңызына тоқталды.
– Қазақ бар жерде домбыра да бар, сөз жүйрігін сынға салар айтыс та бар. Айтыскерлер филиалы осы уақытқа дейін Алматы мен кей өңірлерде ашылған болатын. Сол игі істің жалғасы бас қаламыз – Нұр-Сұлтанда жалғасын тауып отыр. Айтыс адамдары да көп халықтың бірі. Кейде алқалы әңгіме құрып, бірге дайындалып, ой бөліскісі кеп тұрады. Осындай сәттерде филиал ғимаратына еш қымтырылмай жиналып, дайындықтарын пысықтауға мол мүмкіндік туды. Сауапты іске үлесін қосып, қолдау білдіріп жатқан Nur Otan партиясы мен қалалық әкімшілікке алғысымыз шексіз. Қаланың мәдени ордасын, әдеби орталығын қалыптастыруға жасаған үлкен қадам, – дейді ақын.
Биыл ұлтының ғана емес, адамзаттың ұлы тұлғасы саналған ойшыл, ақын Абай Құнанбайұлының 175 жылдық мерейтойы өтеді. Осыған орай, хәкімнің құрметіне әр өңірде республикалық айтыстар ұйымдастырылады. Адамзаттың екінші ұстазы аталған Әбу Насыр әл-Фарабидің 1150 жылдығына да айтыстар өткізу жоспарланған. Елбасы Н.Назарбаевтың «Болашаққа бағдар: рухани жаңғыру» мақаласының аясында өтетін бұл айтыс жоспарлары жайлы Nur Otan партиясы саяси жұмыс департаментінің директоры Ерлан Қарабалаев мәлімдеді.
Салтанатты рәсімнен соң Жүрсін Ерман бастаған айтыскерлер мен лауазымды тұлғалар алдағы уақытта өткізілетін халықаралық, республикалық айтыстардың жоспарын талқылады.
Мадияр ТӨЛЕУ
