Үкімет Ұлттық қордан 2022 жылға арналған республикалық бюджетке түсетін трансфертті бірден 1,6 триллион теңгеге арттыруды жоспарлап отыр. Бұл туралы Ұлттық экономика министрі Әлібек Қуантыров мәлімдеді.
Оның айтуынша, Қазақстан экономикасының өсу болжамы 3,9-дан 2,1 пайызға төмендеген. Атаулы ЖІӨ 91,5 триллион теңгеге бағаланып отыр, бұл бекітілген болжамнан 4,5 триллион теңгеге жоғары.
«Президенттің Үкімет алдына қойған міндеттерін іске асыру және республикалық бюджеттің теңгерімділігін қамтамасыз ету мақсатында 2022 жылға бекітілген Ұлттық қордан кепілдендірілген трансферт мөлшерін 4 триллион теңгеге түзету немесе 1,6 триллион теңгеге дейін ұлғайту ұсынылады. Ұлттық қордың бірнеше функциясы бар. Ол – жинау, тұрақтандыру және дағдарысқа қарсы шараларға қолдау көрсету. Бұл тұрғыдан алғанда аталған процесс – қалыпты жағдай. Бұл контрциклді бюджет саясатының бір бөлігі», – деді Қуантыров Үкімет отырысында.
Министрдің айтуынша, мұнай бағасының қымбаттауы мен доллар бағамының жоғары болуына байланысты Ұлттық қорға қосымша кіріс түседі деп күтіліп отыр. Қазір Ұлттық қорда 55-56 миллиард доллар бар.
