Қарағанды облысындағы Саран қаласындағы индустриялық аймақ кеңеюде. Шина зауытынан бөлек, тағы екі зауыт салынып жатыр. Жақында өнеркәсіптік алаңда Қарағанды облысының әкімі Жеңіс Қасымбек пен «Бәйтерек» Ұлттық басқарушы холдингінің басқарма төрағасы Қанат Шарлапаев болды. Бұл туралы облыс әкімінің баспасөз қызметі хабарлады.
Шина шығаратын зауыт болашақта Орта Азиядағы ең ірі зауыттардың біріне айналуы мүмкін. Бірінші кезеңде оның қуаттылығы жыл сайын 3,5 млн өнімге жетеді. Алдағы уақытта өндіріс жылына 9 млн көпбейінді шинаны ұлғайтатын болады.
Құрылыс 2021 жылы басталды. Жобаны KamaTyresKZ ЖШС – «Аллюр» компаниялар тобы» АҚ және «Татнефть» ЖАҚ бірлескен кәсіпорны жүзеге асырады.
«Бәйтерек» холдингінің төрағасына кәсіпорынның 65%-дық дайындығы туралы айтылды. Жоба жетекшісі Артём Крымов құрылыс кезінде ешқандай қауіп жоқ деп сендірді. Жұмыс кесте бойынша, кейбір жағдайларда тіпті алдын ала орындалатынын айтты.
– Биыл барлық ғимарат пен құрылысты іске асыруға кірістік. Біз барлық іргетасты сала бастадық. Жабдық үшін іргетастар 70% дайын, – деді Артём Крымов.
Зауыт осы жылдың соңында ашылады деп жоспарланған. Мыңнан астам жұмыс орны ашылады. Зауыт қызметкерлері «Татнефть» компаниясының шиналық кәсіпорындарында тағылымдамадан өтіп жатыр.
– Шина өндіру зауыты – бұл өнеркәсіпті дамыту қоры («Бәйтерек» холдингінің құрылымына кіретін Қазақстанның Даму Банкінің еншілес ұйымы) қаржыландыратын ірі жоба. Ол жұмыс орындарын құруға және жалпы елдің өнеркәсіптік әлеуетін дамытуға бағытталған, – деп атап өтті Қанат Шарлапаев.
Өнеркәсіптік аймақта мырыштау желісі бар металл бұйымдарын шығаратын зауыттың құрылысы да жүріп жатыр.
Мұнда жарықтандыру тіректері мен діңгектері, тосқауыл жол қоршаулары дайындалады. Өндірісте жоғары және дәлдігі жоғары технологияларды пайдаланатын заманауи жабдықтар сатып алынды.
Осы аумақта тағы бір компания – KazIsolation – қоспаланған болаттан өнім өндіру бойынша құю цехын салады. Қуаттылығы – жылына 2 мың тонна. Өнім жергілікті нарықта да, бүкіл Қазақстан бойынша да сұранысқа ие болады.
Сондай-ақ «Бәйтерек» ҰБХ Басқарма төрағасы автобус зауытына барды. 400 маманнан тұратын команда екі жылдың ішінде өндірісті жолға қойып, төмен еденді қалалық және 10 метрлік автобустардың екі жаңа моделін шығаруды игерді. Автоқұрамдауыштар өндірісі үшін цехтарды кеңейту және қалпына келтіру жоспарда бар.
Қанат Шарлапаев Саран қаласының өнеркәсіптік әлеуетінің зор екенін, оның тұрғындарының тұрақты жұмыс пен табысқа ие болуына мүмкіндік беретінін атап өтті.
