Кеше елордада физика-математика бағытындағы Назарбаев зияткерлік мектебінің мың оқушысы бір мезетте бірнеше күй орындады. Іс-шара оқу жылының соңында «Ең ауқымды домбыра сабағы» атауымен Гиннесс рекордтар кітабына енді.
Сабақты қосымша білім беру педагогы, Қазақстанның еңбек сіңірген мәдениет қайраткері Айтжан Тоқтаған өткізді. Оқушылар «Сарыарқа», «Балбырауын», «Еркем-ай», «Кеңес», «Жастар биі» сынды танымал күйлердің шығу тарихын баяндап, аталған туындыларды күмбірлете орындады. Мың баланың бір мезетте қатар шерткен күйі астананы сиқырлы сазға бөлеп, ұлттық өнеріміздің құдіретін тағы бір мәрте паш етті.
– Оқушылар не істесе де шын көңілімен істейді. Бүгінгі сабақ балалардың ұлттық өнерімізге деген сүйіспеншілігін дәлелдеді. Зияткерлер физика, математика бағытын тереңдетіп оқыса да, өнерден құр алақан емес. Қаны да, жаны да қазақ болған соң балалар домбыраны тез меңгеріп алады. Өзге елдер тарихи аспаптарын насихаттап, әлемге көрсетіп жатады. Ал біз домбыраны әлі де дұрыс насихаттай алмай жүрміз. Сондықтан бүгінгі жиын қазақ өнерін әлемге танытуға арналды, – деді Айтжан Тоқтаған.
Жалпы, ел астанасындағы физика-математика бағытындағы НЗМ-де домбыра сабағы 2016 жылдан бері өткізіліп келеді. Айтжан Тоқтағановтың жетекшілігімен құрылған мектепішілік «Жігер» ансамблі көптеген республикалық және халықаралық музыкалық байқаулардың жеңімпазы. Олар АҚШ-тың атақты Гарвард пен Бостон университеттерінің, Массачусетс технологиялық институтының сахналарында өнер көрсетті. Ал Гиннес рекордтар кітабына енуге өтінімді былтыр желтоқсан айында берген. Нәтижесінде барлық шарттарды сақтай отырып өткізілген күй кешін 25-тен астам стюард пен 2 куәгер қадағалады. Әрбір 50 қатысушыны бір тәуелсіз стюард бақылап, зияткерлердің шын мәнінде домбыра шертіп отырғанына көз жеткізді. «Назарбаев зияткерлік мектептері» дербес білім беру ұйымының басқарма төрайымы Күләш Шәмшидинованың айтуынша, домбыра үйрену балаларға кедергісін келтірмейді, керісінше жақсы жағынан әсер етіп жатыр. Шығармашылыққа жақын баланың жан дүниесі де таза болады, қоғаммен байланысын сезеді.
– Біздің негізгі мақсатымыз балаларға ұлттық тәрбие беріп, ұлтжанды азамат тәрбиелеу. Физика-математика бағытындағы Назарбаев зияткерлік мектебінің барлық баласы домбыра ойнайды. Оқушылар жас болса да қазақтың домбырасын дүниежүзіне танытып жатыр. Бұл үлкен өнерге әр баланың қосқан кішкентай ғана үлесі, – деді Күләш Шәмшидинова.
Бүгінде қасиетті домбыра аспабы Назарбаев зияткерлік мектептерінің төл символына айналып кеткен. Еліміздегі барлық НЗМ-ге домбыра пәнінің элективті курстары енгізіліп, оның аясында Құрманғазы Сағырбайұлы, Тәттімбет Қазанғапұлы, Нұрғиса Тілендиевтің атақты күйлерінің тарихы оқытылады. «100 күйдің тарихы» жобасы аясында барлық мектепте домбыра ансамбльдері мен студиялары жұмыс істейді.
– Домбыраны үйренгеніме 3 жыл болды. Күй өнері – қазақтың рухани қазынасының бірі де бірегейі. Маған домбыраның әуені ұнайды. Қазір әншілердің барлығы күйді заманауи стильде өз әндеріне қосып орындап жүр. Бұл менің домбыраға деген қызығушылығымды арттыра түсті, – дейді 9 сынып оқушысы Әділби Есімбаев.
Айта кету керек, еліміз бойынша барлық Назарбаев зияткерлік мектептеріндегі оқу жылы домбыра сабағымен аяқталып жатыр.
