Әдетте жолаушылар автобусты күтетін еді. Бұл жолы сол автобустардың өзі сарғайып, сағаттап кезек күтіп тұр. Қайда, ненің кезегі дейсіз ғой? Кәдуілгі сұйытылған газ құю бекеттерінің маңында қаңтарылуға мәжбүр.
Жалпы, Алматы қаласында 2400-дей қоғамдық көлік қала тұрғындарына қызмет көрсетеді. Оның 800-ге жуығы газбен жүреді. Бұл көліктер көк түтінге оранған Алматының экологиялық халін түзеу мақсатында әкелінген болатын.
Өткен аптадан бері осы 800 автобус жолаушылар тасымалдауға тиіс уақытының жартысын тек газ құю бекетінің маңында кезек күтумен өтукізуде.
Мәселе қайдан шықты?
Өз уақытымен жүріп тұрған көліктердің бұлайша аяқ астынан қаңтарылып қалуына не себеп? Сауалға жауап алмақ болып, Алматы қалалық әкімідігіне хабарластық. Жауаптылардың айтуларынша, барлық мәселе қаладағы бірнеше газ құю бекеттерінің жөндеу жұмыстарына жабылуынан туындаған екен.
«Қазіргі таңда қалада автобустарға газ құю мәселесінде қиындықтар туындап отырғаны рас. Жалпы, қала бойынша қоғамдық көліктерге 6 газ құю бекеті қызмет көрсетеді. Оның бесеуі – «АвтоГазАлматы» ЖШС-не тиесілі. Қазіргі таңда соның екеуі ғана жұмыс істеп тұр. Қалған үшеуі жөндеу жұмыстарына жабылған. Осыған байланысты автобустарды газбен қамтуда қиындықтар туындап отыр. Аталған мәселе Басқарманың бақылауында, жақын арада оң шешімі табылады», – деп жауап берді Алматы қалалық Мобилділік басқармасының өкілі Индира Бекболат.
Ұзын-сонар кезек кептелісті де күшейтті
Кезек күтіп тұрған автобустардың ұзын-сонар кезегі қоғамдық көліктердің қатынау арақашықтығына айтарлықтай әсер етуде. Осының салдарынан жолаушылар діттеген жеріне уақытында жете алмай қалды. Газ құю бекеті маңындағы көшелерде ұзыннан-ұзақ тізіліп тұрған автобустар онсыз да кептелістен көз аша алмай тұрған Алматы көшелеріне жығылған үстіне жұдырық болуда. Бір ғана мысал, Момышұлы көшесі мен Райымбек даңғылының қиылысындағы газ құю бекетіне кезекке тұрған автобустар көліктердің тығынын екі есе ұлғайтып жіберді. Оған қоса, Райымбек даңғылы қаланы іргелес аудандар мен арғы жағы Жамбыл, Түркістан облыстарын жалғайтын бірден-бір көше.
Жүргізушінің жалақысы не болады?
Жұмыс уақытының жарты күні көлігіне газ құйып алу үшін кезек күтумен өтетін жүргізушілердің мұң-мұқтажы бар. Бізбен тілдескен олар уақыттарының көп бөлігі құр сарғайып тұрумен кетіп жатқанын, ал жалақылары тек жүрген сағатына ғана төленетінін айтып қынжылды.
«Өзіңіз көріп тұрғандай, ұзын-сонар кезекте тұрамыз. Күнде – осы. Бакты бір толтырып құйғанымыз жарты күн жүруге ғана жетеді. Содан түстен қас-қарайғанға дейінгі уақытымыз тек осы кезек күтумен өтеді. Ал бізде жалақы жүрген әрбір сағатымызға 1100 теңгеден төленеді. Осы айдан бастап өткен айларға қарағанда, жарты есе төмен жалақы шыққалы тұр. Мардымсыз жалақымен қалай өмір сүреміз», – дейді аты-жөнін жазбауды өтінген автобус жүргізушісі.
Жүргізушілердің еңбекақы мәселесі қалай болмағын білмек болып, қалалық қоғамдық көлікке жауапты «АлматыЭлектроТранс» ЖШС-не хабарластық. Олар жүргізушілердің жалақы көлемін басқаша жолдармен уақытша арттыру мәселесі қалалық әкімдікпен бірлесіп шешіліп жатқанын жеткізді.
15 шілдеден кейін жағдай реттеледі
Сонымен, қала бойынша қоғамдық көліктерге газ құю қызметін ұсынатын алты бекеттің бірден үшеуі жөндеуге жабылуы алматылықтарды айтарлықтай әбігерге салып қойды. Бұл бәрінен бұрын күнделікті жұмыс орны мен өзге де жерлерге тек қоғамдық көлікпен қатынайтындарға ауыр тиіп тұр. Жауапты мекеменің уәжіне сенсек, мәселе шілденің ортасына қарай реттеледі.
«15 шілдеде жөндеу жұмыстары аяқталып, газ құю бекеттері жұмысын бастауы тиіс. Сонымен қатар жеке инвестор 20 шілдеге дейін тағы бір стансаны іске қосады деп жоспарлап отыр. Бұл шаралар қалыптасқан жағдайды біраз жеңілдетуі тиіс. Сондай-ақ қала әкімдігі көгілдір отын құятын үш бекеттің құрылысын бастау туралы шешім қабылдады. Қосымша шара ретінде автобустар ағынын реттеу үшін газ құю кестесі жасалды», – дейді «АвтоГазАлматы» ЖШС-нің өкілдері.
Әне-міне дегенше, бүгін шілде айы да басталды. Аталған мәселе жауапты тұлғалар айтқан уақытында шешіліп кетсе, құба-құп болар еді. Әйтпесе, Алматының экологиялық жағдайын жақсартуға септігін тигізеді деп әкелген көгілдір отынмен жүретін автобустар тұрғындарға қызмет көрсетудің орнына бос қаңтарылып уақыт өткізетін сияқты.
