– «Көне Тараз» тарихи-этномәдени кешеніндегі нысандардың жылу мәселесін шешу қиын емес. Күні кеше сәулеттік ғимараттардың төбесіне шығып көрдім. Күннен қуат алатын қондырғылар тұр. Мамандарға аталған қондырғыларды іске қосуды тапсырдым. Сондықтан жылыту қондыр- ғылары істемейді деп бірден байлам жасауға болмайды. Тек оны дұрыстап іске қосу керек. Дәретхана мәселесіне келер болсақ, мұнда да қиындық көріп тұрған жоқпын. Қоғамдық дәретхананы орнатып, тәртіпсіздікті құзырлы мамандарға қадағалауды мықтап тапсырамын, – деді қала әкімі.
Әрине, Бақытжан Әмірбекұлы айтқандай, бәрі оңай шешіліп кетсе қанеки? Алайда мұндай сырғытпа жауапқа бүгінде жұртшылықтың еті үйренген. Бұған дейін облыстың экс-әкімі Бердібек Сапарбаев та БАҚ өкілдерімен кездесуде осы мәселелердің бақылауында тұрғанын айтып, кешендегі нысандарды қыстан қалдырмай жылуға қосатындығына уәде еткен. Алайда айтылған сөз айтылған жерінде қалды.
Мұнан бөлек, шаһар басшысы Бақытжан Орынбеков қала келбетіне қатысты ауқымды жобалар қолға алынатындығын айтты. Алайда бірер ай бұрын бұқаралық ақпарат құралдары өкілдерімен кездескен облыс әкімі Нұржан Нұржігітов Тараз қаласының көркейтуге қатысты бірде-бір жоба жанданбайтынын ашық айтқан. Аймақ басшысы оның орнына халықтың күнделікті мәселесіне көңіл бөлетіндігін мәлімдеген. Қызығы, қалаға кейіннен әкім болып келген Орынбеков облыс әкімінің бұл ұстанымынан хабарсыз болса керек.
© коллаж: Еркебұлан Дүйсеболатов[/caption]
Кешен аумағындағы «Көне Тараз» мұражайы да құлаудың аз алдында тұр. Қазақ хандығының 550 жылдық мерейтойы қарсаңында ашылған нысанның жағдайы содан бері оңалмады. Облысқа жаңадан келген әкімнің қай-қайсысы да нысанды бір көріп кеткені болмаса, ғимараттың құрылысына қатысты нақты шешім қабылдай алмай келеді. Қазір ел арасында «бұрынғы әкімнің «мұрасындай» болған мұражайды кейінгі әкімдер бәрібір жөндемейді» деген сөз ашық айтылып жүр.
Ал Тараз қаласының жаңа әкімі Бақытжан Орынбеков талай жылдан бері шешімі табылмай келе жатқан түйткілдердің түйінін тарқату қиын еместігін айтады.