Ал республикалық газ саласының ардагерлер кеңесі төрағасы Ерқанат Темірханов болса, бұл жолғы бәсекеде мамандар бір-бірімен тығыз қарым-қатынас орнатып, білмегенін үйреніп, біліктілікті одан әрі арттырып, нағыз маман болып тарқасатынын жеткізді. Миллиондаған тұрғынның алғысына бөленіп жүрген газшылардың осынау жанкешті әрекеттеріне алғыс білдіріп, барша қатысушыларға шабыт берді. «Жылдан жылға жаңа технология пайда болады. Жұмыскерлер осыған дайын болуы керек. Еліміздің түкпір-түкпірінен келген байқауға қатысушылар шығып жатқан жаңа құрылғылармен қалай жұмыс істеу керек екенін бір-бірінен үйреніп, саланы жетік меңгереді. Мәселен, кез келген уақытта газ саласында оқыс жағдай кездесуі мүмкін. Жұмысшылар сын сәтте дереу шешім қабылдай алуы, аз уақытта жылдам әрекет етуі арқылы апаттың алдын алуы тиіс. Бұл жарыста барлығы да шынайы көрінеді. Басшылар осында саладағы техникалық кемшіліктер болса оның орнын толтыруға жұмыс істейді», – деп атап өтті Ерқанат Уақбайұлы БАҚ өкілдеріне берген сұхбатында.
Екі күнге созылған финалдық сайыста қатысушылар 15 конкурстық мамандық бойынша бақ сынап, практикалық тапсырмаларды орындады. Олардың ішінде «Технологиялық компрессорлар машинисі», «Технологиялық қондырғыларды жөндеу слесарі», «Желілік құбыр өткізуші», «Газ тарату станциясының операторы», «Жерасты құбырларын тоттанудан қорғау монтері» және «Апаттық-қалпына келтіру жұмыстарының слесарі», «Ұңғымаларды зерттеу операторы» «Газ өндіру операторы» сынды бірқатар сайыс түрлері бар. Тартысты өткен байқауда қатысушыларды бақылаған комиссия мүшелері олардың өндірістік алаңда орындаған жұмысының сапасын, еңбектің ұтымды және қауіпсіз тәсілдерін қолдануды, қатысушының өндірістік дербестік дәрежесін, тапсырманы орындауға жұмсалған нақты уақытты, сондай-ақ дәрігерге дейінгі алғашқы көмек көрсету дағдыларын бағалап, жіті тексеріп отырды.
Әрбір номинация бойынша ерекше қабілеттері мен біліктілігін көрсеткен сайыс қатысушылары оза шауып, жеңіп шықты. Алайда барлығының да ерекше дайындықпен келгені байқалады. Дегенмен байқаудың аты – байқау. Шараның салтанатты жабылуында сөз алған «Интергаз Орталық Азия» АҚ жергілікті кәсіподақ ұйымының төрағасы Шалқар Ермекұлы да үміткерлердің бір-бірімен бәсекелесіп емес, достастықпен сайысқа түскенін, жанашырлықпен білмегенін түсіндіріп, адамгершілік көзқарас танытқанын сайыс барысында байқағанын жеткізді. Сонымен, мәре соңы таяп, әр номинация жеңімпаздары анықталды. Әр номинация бойынша 3 орыннан белгіленіп, жеңімпаздарға дипломдар табыс етілді. Сондай-ақ жоғары кәсіби шеберлігі үшін еңбекақысына жылдық үстемеақы белгіленді.
Байқауға қатысушылар байқаудың шарттары мен тапсырмалары үнемі жетілдіріліп отыратынын, өнеркәсіптік қауіпсіздік пен еңбекті қорғау ережелерін білуге қойылатын талаптардың артқанын және қатысушылардың дайындық деңгейі жыл сайын өсіп келе жатқанын жеткізді. «Бұл алаңда айтарлықтай өткір бәсекелестік тудырды. Ұйымдастырушылар қатысушыларға өз қабілеттерін толық көрсетуге мүмкіндік беретін ең қолайлы және жайлы жағдай жасаған. Орал қаласындағы өндірістік филиалда 12 жылдан бері жұмыс істеп келемін. Өткен жылы да осынау сайысқа қатысып, екінші орынды еншілеген болатынмын. Биыл қалайда бірінші орынды иемденемін деген үмітпен, дайындықпен келдім. Өзімнің кәсіби мықты екенімді дәлелдегім келді. Мұндай шаралар бізді ынталандырып, жұмысқа деген қабілетімізді арттырады. Өзге өңірлерден келген әріптестерімізден білмегенімізді үйреніп, тәжірибе алмасып, одан сайын білімімізді арттырып қайтамыз. Әр байқауда әртүрлі технологиялар болады. Былтыр мәселен тек электрмен дәнекерлеу болса, биыл оған аргонмен дәнекерлеу тәсілі қосылды. Енді күнделікті тәжірибеде бұл тәсілді енгізетін боламыз», – дейді байқаудың «Электр газбен дәнекерлеуші» номинациясы бойынша жеңімпазы, оралдық Марс Ержанов.
Осылайша, қатысушылар теориялық білімдерін практика жүзінде тағы бір дәлелдеп тарқасты.
Шымкент қаласы