– №1 және №3 жылу электр орталықтарында 26 қыркүйекте жылыту маусымының басталуына байланысты жылуды іске қосу басталды. Стансаларда жылу желілерінің контурын толтыру аяқталғаннан кейін айналымды жүргізу үшін желілік сорғылар іске қосылады. Қыркүйектің 30-ы желілік жылытқыштар арқылы су өткізуге арналған ысырмалар және желілік суды жылыту үшін буды жылуландыру іріктеулері ашылады. Жылу беру маусымына дайындық кезінде 5 қазандық агрегатында және 3 турбинада күрделі жөндеу жұмысы жүргізілді. 11 қазандық пен 7 турбинада жөндеу өтті. Әлі де болса ЖЭО-3-тегі №4 қазандық агрегаты мен №5 турбогенераторының күрделі жөндеулері жалғасуда, – дейді «Қарағанды Энергоцентр» ЖШС бөлім басшысы Татьяна Клокова.Оның айтуынша, отын қоры да жеткілікті. Жалпы, 335 мың тонна көмір бар. Ал қаладағы екі ауданда жағдай қалай? Жылыту мәселесіне жауапты Қазыбек би атындағы аудан әкімі орынбасары Мадияр Жағабайұлы:
– Біздің ауданда тұрғын үйлер жылыту маусымына дайын. Тек кейбір үйлерде ғана ақаулар болды. Толығымен жөнделгеннен кейін ол үйлер де жылу желісіне қосылады, – дейді.Әлихан Бөкейхан ауданының шенділері де 100 пайыз дайын екендіктерін жеткізді. Нақтылап айтсақ, Қарағанды облысында алдағы жылыту маусымына дайындық науқаны штаттық режимде өтті. Күзгі-қысқы кезеңге барлығы 7 энергия және 685 жергілікті жылу көзі, 569 шағын электр стансасы, 2 116 км инженерлік желі, 1 126 әлеуметтік сала нысаны және 5 598 тұрғын үйдің негізгі және қосалқы жабдықтары дайындалды. Аймақта жалпы қуаты 218,7 МВт ЖЭК 7 объектісі бар, оның ішінде қуаты 216 МВт 4 күн электр стансасы және қуаты 2 МВт 2 биоэлектр стансасы, қуаты 0,6 МВт 1 су электр стансасы барын айта кеткен орынды. Дегенмен Теміртау қаласы жылу маусымына дайын болмай шықты. Қалада жылу маусымы өткен жұмада басталған. Жергілікті билік дәл сол күні магистраль құбырлары жөнделіп бітетінін айтқан. Енді шенділердің уәдесінде тұра алмауынан халық зардап шегіп отыр. «Суық үйден әбден тоңдық» деген бұқара билік өкілдерінің немқұрайлығына наразы. Ал шенеуніктер алты шақырым құбырдың ауыстырылып жатқанын айтады. Өздері кестеден кешіккенін мойындап отыр. Оған құрал-жабдықтың Ресейден кешігіп жетуі себеп болған.
– Бүгінгі күнде 200 гигакалорий жылу жетпей тұр. Бұл өте көп деген сөз. Білесіздер ме, қақаған қыста бізге жылу тиісті деңгейде жетпей жатады. Сол үшін жеті қазандықтың құрылысын жүргізу шешімі қабылданған. Сол кезде жылумен толық қамтитын едік. Бірақ қазандықтардың құрылысын келесі жылға қалдырды, – дейді Теміртау қаласы ТКШ бөлімінің басшысы Ринат Қалдырбеков.Күнтізбеде желтоқсан, қаңтар, ақпан болғанымен Арқада қыс «алты» айға созылады. Қазан мен қараша күзге тиесілі болса да, халықты бүрсеңдеткен суығымен қысты бір орайды. «Сәуір келмей, тәуір болмас» деп наурызды да қысқа еншілейміз. «Қысқа сақадай саймыз» деген жауапты мекемелерге тек сыннан сүрінбей өту маңызды.
Қарағанды облысы