– Шынымды айтсам, партия облыстық филиалына бірінші рет келуім емес. Осыған дейін балаларымды мектепке орналастыруда қиындықтар туып, алайда партия өкілдері облыс орталығындағы №36 орта мектепке қабылдатқан еді. Дегенмен азаматтық алу бойынша өтініш айту ойымызға келмепті. Танысымыз айтқан соң бірден келдік. Алты ай құр сандалғанымызды ойласам жаным ауырады. Осы аралықта шешілмеген мәселеміз бір аптаға жетпейтін уақытта шешілді. Енді менің отбасым осы елдің толыққанды азаматы, – дейді қуанышы қойнына сыймаған Нұрбек Асанов.Бүгінгі күні Нұрбек жары Алтынай екеуі 3 бала тәрбиелеп отыр. Екеуінің де орта арнаулы білімі болса да азаматтықтары болмағандықтан әр жерде жалданып жұмыс істеп келген. «Елім, жерім» деп келген қандастарымыздың ендігі мақсаты тұрақты жұмысқа орналасу болса, бұл мәселе бойынша да «AМANAT» партиясы Жамбыл облыстық филиалы қол ұшын созуда.
– Нұрбек Асанов пен жары Алтынай Қуанова бізге өтініштерімен келді. Шыны керек, әбден әбігерге түскен екен. Біз бірден құзырлы орган өкілдеріне хабарласып, мәселелерінің оңтайлы шешілуіне ықпал еттік. Енді бұл кісілер тұрақты жұмысқа орналасу бойынша өтініш тастап, өтініш аясында қалалық жұмыспен қамту орталығының мамандарына ұсыныспен шықтық. Аталған мекеме бірнеше жұмыс орындарын ұсынып отыр. Қай жаққа орналасатынын өздері шешетін болады. Осылайша, бұл мәселе де оң шешімін тауып отыр, – дейді «AМANAT» партиясы Жамбыл облыстық филиалы қоғамдық қабылдау бөлмесінің меңгерушісі Үмітбала Ибраимова.Осылайша, бүтіндей бір отбасының бірнеше мәселесі бір сәтте шешілуде. Бұл әрине, партия пәрмені мен қоғамдық қабылдау бөлмесінің ықпалы екені анық. Аталған бөлмеге жыл басынан бері 3 622 өтініш түссе, оның 55 пайызы оң шешімін тапқан. Мұндай жүйелі жұмыс халықтың партияға деген сенімін еселей арттыратыны тағы анық.
Жамбыл облысы