– Облыс орталығында шығыстық үлгідегі осындай тамаша кешеннің бой көтергені қуантады. Сырттан қонақ келсе де мақтанып көрсетеміз. Алайда қазір бізге нысанның сұлуынан жылуы маңызды болып тұр. Кешен алғаш ашылғанда төбесіне күннен қуат алатын қондырғы орнатылып, жылу содан беріледі делінген. Алайда ол қондырғы сол бойы іске қосылған жоқ. Оған себеп 12 радиатордың жартысы қыс түскенше істен шығып, жарамсыз болып қалды. Кейін алып келген батареялардың қуаты ғимаратты жылытуға жетпеді. Үш жылдан бері суық бөлмелерді қыстап келеміз, – дейді Сауран Қалиев.Орталық басшысының жанайқайы осы жылы жергілікті билікке жеткендей көрінген. Олай дейтініміз, Тараз қаласының жаңа әкімі Бақытжан Орынбеков журналистермен кездесуде нысандардың үстіне шығып көргенін, бұйыртса қыста жылуды іске қосу үшін барлық амал жасалып жатқанын айқан. Алайда әне-міне желтоқсан айы түгесілгелі тұрса да «баяғы жартас, сол жартас» күйі тұр. Жуырда аталған кешенге облыс әкімі Нұржан Нұржігітов те ат ізін салып, нысандардағы жағдайды көзбен көрді. Аймақ басшысы ғимараттардың жылыту жүйесінің орталық қазандығына қосылмағанынан және жылыту үшін электр батереялары пайдаланылып отырғанынан хабардар. Ол бойынша жауапты азаматтарға бірнеше мәрте тапсырма да беріліпті. Бірақ олар өздеріне берілген тапсырманы орындауда жауапсыздық танытып келе жатқан көрінеді.
– Берілген тапсырма бойынша әлі күнге ешқандай шара қабылданбаған. Облыс орталығында орналасқан кешеннің келбеті мен қызметі қаншалықты маңызды екенін әркім біледі. Алайда оның жылу жүйесі неге ретке келмей отыр? Бұл мәселені Тараз қаласы әкімдігі жіті назарға алып, жобалаушылармен нақты әрі нәтижелі жұмыс жүргізуі керек, – деген Нұржан Молдиярұлы жылу жүйесін жақын арада реттеуді жауаптыларға тағы тапсырды.Әлбетте, түйткілдің билік тарапынан назарға алынып, тапсырма берілгені дұрыс-ақ. Алайда әкім қаралардың сөзіне сүйенсек, кешеннің жылу жүйесіндегі мәселе биыл шыққандай көрінеді. Ал мұнда жұмыс істеп жатқан мамандардың тоңғанын айтып, шырылдап жүргеніне бірнеше жылдың жүзі болды. Бұл кешенде Ш.Мұртаза атындағы руханият және тарихтану орталығы, облыстық тарихи-өлкетану музейі, көркемсурет галереясы және көрме зал жұмыс істейді. Бастапқыда бұл орталықтардың барлығы облыс әкімдігінің Мәдениет, архивтер және құжаттама басқармасына қарауы керек болған. Алайда кейіннен басқарма «Көне Тараз» тарихи-этномәдени кешені мекемеге толықтай өтпегенін алға тартып, жауапкершіліктен ат тонын ала қашты. Нәтижесінде, жылу жүйесіне қатысты қосалқы қондырғыларды алдыруға Тараз қаласы әкімдігінің құрылыс бөлімі жауапты болып шықты. Осылайша, «сен салар да, мен саларға» салған шенділердің әрекетінен кешен жылусыз қалып, ондағы қызметкерлер бөлмелерінде бүрсең қағып отыр. Күні ертең миллиондаған қаржыға салынған нысандардың қабырғалары көгеріп, төбесі опырылып ортасына түспесіне де ешкім кепілдік бере алмайды. Жалпы, «Көне Тараз» тарихи-этномәдени кешеніне қатысты ел арасында әңгіме көп. Кешеннің о бастағы техникалық жобасын ресейлік мамандар жасаған көрінеді. Нысындарды күн батареяларымен жылыту жобасын да солар ұсынған. Кешен аумағында орналасқан «Сағат» стелласын да тұрғызған шетелдік мамандар екен. «Сағат» стелласы көп ұзамай істен шыққанын ескерсек, техникалық жобалардың барлығы бір адамның қолынан шыққан секілді. Сондықтан олардағы ақауды жөндеу тек шетелдік маманның қолынан келеді. Ал ол маман әкімдіктегілермен түсінісе алмай, екіарада кикілжің туған дейтіндер көп. Сол себепті аталған маманды бүгінгі билік өкілдері қондырғыларды қайта іске қосып беруге шақыра алмай жатқан сияқты. Әрине, бұл ел аузында жүрген әңгіме. Ақиқаты аймақтың атқамінерлеріне ғана мәлім. Ең бастысы, «Сағатты» болмаса да, қыста жылусыз отырған кешеннің мәселесін біржақты реттеп береді деп сенеміз.
Жамбыл облысы