Былтырғы жылдың қыркүйегінде Атырау қаласының әкімі концерттік залдың құрылысы жалғасатынын мәлімдеді. «Қазір шаралардың басым көпшілігі Махамбет атындағы академиялық драма театрында өтеді. Ал оның сыйымдылығы 500-дей адамды қамти алады. Қала халқы 400 мыңға жақындап келеді. Сондықтан мұндай көлемдегі концерттік залдар қалаға қажет», – деген еді Мейірім Қалауи Өңірлік коммуникациялар қызметінде өткен брифингте.Бірақ әне-міне деп қанша уәделеткенімізбен, концерттік зал он үш жыл бұрын қалай тұрса, әлі күнге дейін сол қалпында қаңырап тұр. Атырау облысы әкімдігінің баспасөз қызметінен жыр болған құрылыстың болашағына байланысты қандай шешім қабылданғанын сұрадық. Әкімдік 1 200 орындық концерт залының құрылысын инвестициялық жоба арқылы жүзеге асыру мәселесі қарастырылып жатқанын хабарлады.
«Нысанның техникалық жағдайына сараптама – металды және темірбетонды конструкциялардың жарамсыз екенін анықтады.
Бұған дейінгі берілген, яғни 2013 жылы жүргізілген сараптама нәтижесінде қайта жөндеу жұмыстарына 5 млрд теңге қосымша қаражат қажеттігі туралы қорытынды берілген болатын.
Алайда облыстық мәслихаттың қаралымында нысанды мемлекеттік бюджеттен жалғастырудың мақсатсыздығы және тиімсіздігі туралы шешім қабылданды.
Қазір аталған нысанның құрылысын инвестициялық жобаға сәйкес бұзу немесе жалғастыру мәселесі қарастырылуда» деп түсінік берді Атырау облысы әкімінің баспасөз қызметі.
Кезінде «Атырау дәрі-дәрмек шығарады. Бұл – экономиканы әртараптандыру мақсатында жүзеге асырылып жатқан жоба» деп фармацевтикалық зауыттың жарнамасын алаулатқан болатынбыз.
800 млн дәрілік таблетка, 300 млн капсула, 78 млн ампула, 3 млн қаптама жақпамай және көктамырға құюға арналған 12 млн флакон ерітінді өндіреді деп мәлімделген фармацевтикалық зауыт құрылысының тұралағанына міне, тура – 9 жыл.
Кезінде Атырауда тұрғызылуы тиіс фармацевтикалық зауыт құрылысына қомақты қаражат қаралды. Қаржының 49 пайызын «Атырау» әлеуметтік кәсіпкерлік корпорациясы бөлді. Корпорация арқылы 800 млн теңге көлеміндегі қаражат зауытқа құрал-жабдық алу үшін бөлінген еді.
«Алайда компания корпорация арқылы бөлінген қаражатты құрал-жабдыққа емес, құрылыс саласына жұмсап жіберген. Қаражат мақсатты жұмсалмағаны себепті, оны қайтару мәселесі көтерілді. Осылайша, жоба тоқтап қалды. Қазір зауытта инфрақұрылым бойынша мәселе жоқ. Жол бар, газ тартылып тұр. Қалай десек те, фармацевтикалық зауытқа елімізде қажеттілік бар. Себебі Қазақстанда дәрі-дәрмек шығарып жатқан үлкен зауыт жоқ. Алматыда, Шымкентте цех деңгейіндегі өндіріс қана бар. Бұл еліміздің қажеттілігі үшін жеткіліксіз», – дейді Парламент Сенатының депутаты Ғұмар Дүйсембаев.Облыс әкімдігі зауыт құрылысын жандандыру үшін инвестор іздеу үстінде. Бірақ оған қызығушылық танытқан компания әзірге табылмай тұр. Кезінде қызылды-жасылды жарнамалары жер жарған Атыраудағы «ірі нысандардың» сиқы осындай.
Атырау облысы