Бүгінде ғылымның, жастар өмірінің жаршысындай болып, жаңалықты жеткізіп жүрген басылым алғашында 300 данамен «Үздік оқу үшін» деген атпен шыға бастады. Кейін таралымы 1 000 данаға жетті. Артынан Қазақстан Компартиясы Орталық Комитетіне дейін жазып, газет атауы «Қазақ университеті» деп өзгертілген еді. Осы күні бұл басылым әл-Фараби атындағы ҚазҰУ-нің жанынан шығып отыр.
Осыған бастамашы болып, ыстық-суығына күйіп-пісіп, оның қалыптасуына бірден-бір үлес қосқан – ғалым Төлеген Тәжібаев. Ол 1948-1953 жылдар аралығында қазіргі әл-Фараби атындағы Қазақ ұлттық университетінің ректоры болып тағайындалды. Сол кезде қасиетті қара шаңырақ жұмысын жолға қойып, оны одан әрі жандандыруға тырысып, тың бастамалар бастады. Біріншіден, оқу орнының материалдық-техникалық базасын жақсарту, екіншіден оқу-тәрбиелік жұмыстың сапасын көтеру, үшіншіден, студенттер мен оқытушылардың әлеуметтік жағдайын жақсартты. Небәрі бес жылда Т.Тәжібаев бірнеше факультеттің ашылуына мұрындық болды. Оның ішінде философия, экономика, биология-топырақ, тарих факультеті өз алдына бөлініп шықты. Сол кезеңде қазақшасы жетіспей тұрған биология, химия, математика салаларында қазақ тіліндегі оқулықтарды көбейтіп, қазақ топтарын ашты.
Одан бөлек, жаңадан 13 кафедра ашылды. Бүгінде Т.Тәжібаевтың бастамасымен ашылған ғылым кафедраларында білімді де білікті мамандар жұмыс істейді. Соның арасында ғалымның ізгі жолын жалғап, ұрпақ тәрбиесін жоғары қойған – Роза Қасымова. Оның педагогика саласына жасаған еңбегі, ізденімпаздығы болашақ ғалым-ұстаздардың біліктілігін арттыруға көмегі зор. Ғалымның шәкірттеріне үлгі боларлық ісі көп. Қазақтың белгілі жазушылары мен ғалымдары М.Әуезов, Е.Бекмаханов, Қ.Ысқақ, Б.Кенжебаев, Х.Бекхожин еңбектеріне сын айтып, жөнсіз жала жапқандарға қарсы тұрып, ақ пен қараның аражігін айқындап бергені ел аузында қалып, кейін тиісті бағасын алды.
Ұйымдастырушылық қабілетімен көзге түскен ол жастардың ғылым жолындағы ізденістерін көре біліп, білім алуына зор мүмкіндік жасады. Бір сөзбен айтсақ, жас ғалымдардың жүрегіне ғылым отын жаға білді. Мәселен, ауылдан келген студенттердің жатақханаға орналасудағы кедергілерді жойып, бақылауға алды. Әсіресе, ата-анасы жоқ, жағдайы төмен отбасылардан шыққан студенттерге қамқорлық етіп жүрді. Оның бойындағы бұл мейірімділігі балалық шағы қиын-қыстау, ашаршылық заманына тура келіп, қаншама қиындықты басынан өткергенінен болар. Өйткені ата-анасынан ерте айырылған ол орыс отбасының қамқорлығына алынады. Көзі көргендер оның зеректігі, өнер мен спортқа деген құштарлығы ерте кезден байқалғанын айтуда.
