Партия филиалының мәжіліс залында аудан әкімінің орынбасары Ғаділбек Әлібековтің төрағалығымен «Жер аманаты» комиссиясының отырысы өтті. Комиссия мүшелері ағымдағы жылғы жұмыс жоспарымен танысып, жыл соңына дейін 6 940 гектар жер телімдерін мемлекет меншігіне қайтару мәселесін қарады. Алдымен «AMANAT» партиясы Казталов аудандық филиалының төрағасы Сәкен Сәлімжанұлы «Жер аманаты» комиссиясының биылғы жұмыс жоспарымен таныстырды. Жоспарға сәйкес ауыл шаруашылығы мақсатындағы жер телімдерін қайтару мақсатында ауданымыздағы барлық ауылдық округте жекелеген көшпелі отырыстар өткізіліп, шаруақожалық жетекшілерімен түсіндіру жұмыстары жүргізілмек. Аудан әкімінің орынбасары жұмыс жоспарына жер иелерінің ауыл шаруашылығы мақсатындағы жерді мақсатты пайдалануын тексеруді жоспарға енгізуді ұсынып, комиссия бірауыздан мақұлдады. Ал аудандық жер қатынастары бөлімінің статист маманы Нұрхат Оразғалиев ауданымыз бойынша мақсатты пайдаланылмай отырған ауыл шаруашылығы мақсатындағы жер учаскелерін мемлекет меншігіне қайтару мәселесі жөнінде баяндама жасады.
«Биыл 16 жер пайдаланушы 18 160 гектарды құрайтын жер учаскесін арнайы жер қорына қайтарды. Оның ішінде 4 ауылшаруашылық өндірістік кооперативі және 1 кредиттік жауапкершілік серіктестігі 5 350 гектарды құрайтын жер учаскесін жалдау мерзімі өтуіне байланысты, ал 12 810 гектарды құрайтын 11 шаруа қожалығының жер учаскелері мониторинг жүргізу нәтижесінде «мерзімі өтті» деп танылып, мемлекет меншігіне қайтарылды. Мал жаю үшін халықтың жайылым алқаптарға деген сұранысын қамтамасыз ету мақсатында Казталов ауданының қордағы жерлерінен бөлу есебінен 163 326 гектарды құрайтын жер учаскелері резервке қойылды. 2023 жылы 29 475 гектарды құрайтын жерді иеленуші 10 азаматқа хабарлама, 11 азаматқа нұсқама жіберіліп, 3 азаматқа тексеру амалы басталды», – деді маман.
Жер қатынастары бөлімінің маманы өз сөзінде 6 940 гектар жерді мемлекет меншігіне қайтару мақсатында жұмыстардың басталғанын да атап өтті. Комиссия мүшелері тарапынан пайдаланылмай жатқан жерді резервке қою кезінде ауыл тұрғындарына тиесілі, «қызыл аймаққа» енген жердің көлемін ескеріп, аталған аймаққа жақын орналасқан игерілмей жатқан жерлерді резервке қою қажет екені ұсынылды. Сонымен қатар игерілмей жатқан жер иелеріне алдын ала хабарламалар мен ескертпелер жіберуді назарда ұстау керек екені айтылды. Комиссия отырысында ауыл шаруашылығы мақсатындағы жерді пайдалану, ауылдық округтердің жер көлемін ұлғайту сынды ағымдағы мәселелер де талқыланды.