Аталған шараға «AMANAT» партиясы Түркістан облыстық филиалының төрағасы Алтынсары Үмбетәлиев, аудандық партия филиалының төрағасы Алмас Әбдрахманұлы, облыстық мәслихат депутаттары, фракция мүшелері Н.Жамалбеков және С.Ералиев, Сайрам аудандық кәсіпкерлік палатасының директоры Г.Байболов, «Ырыс» шағын несие ұйымының аймақтық сарапшысы Д.Ендібаев пен ауыл округі әкімдері және дербес бөлім басшылары қатысты.
Шара аясында «AMANAT» партиясы Түркістан облыстық филиалының төрағасы Алтынсары Дүйсенбекұлы облыстық партия филиалы тарапынан атқарылып жатқан жұмыстар мен алдағы жоспарларға тоқталып, барлық аудан, қалада «Ауыл аманаты» жобасы кеңінен түсіндіріліп, тұрғындарды толық ақпараттандыру жұмыстары қарқынды түрде жүргізіліп жатқандығын атап өтті. Сондай-ақ ашық есік күні аясында қоғамдық қабылдау өткізіліп, онда «Ақбұлақ-ӨНІМДЕРІ» кооперативінің төрағасы А.Керимовтің, Қайнарбұлақ ауылдық округі тұрғындарының «Ауыл аманаты» жобасы бойынша сұрақтарына жауап берілді.
Бүгінде Сайрам ауданы бойынша бұл бағдарламаның бірінші кезеңіне Ақбұлақ және Жібек Жолы ауылдық округтері ұсынылған. Жоба аясында ауылдық округтерде скрининг жүргізіліп, нәтижесінде өсімдік шаруашылығы, мал шаруашылығы, құс шаруашылығы және өзге кәсіппен айналысуға Ақбұлақ және Жібек Жолы ауылдық округтерінен 244 тұрғын жеңілдетілген 2,5 пайыздық несие алуға қызығушылық танытқан. Олардың ішінде 70 азамат АӘК алушылар.
Қазір Жібек Жолы ауылдық округінен «Қазақбай ДИЯ» кооперативі құрылып, кооператив құрамына кіріп несие алуға 60 азамат ниет білдірсе, оның 21-і құжаттарын жинақтап жатыр. 10 азаматтың құжаты аудандық «Ырыс» микроқаржы ұйымына тапсырылып, кепілге қойылатын мүлікке аталмыш мекеменің облыстық филиалынан тәуелсіз бағалаушының келуі күтіліп отыр. Ал Ақбұлақ ауылдық округі бойынша «Ақбұлақ-ӨНІМДЕРІ» кооперативі құрылып кооператив құрамына кіріп несие алуға 65 азамат ниет білдірген. Оның 35-і құжаттарын жинақтауда. 10 азаматтың құжаттары облыстық «Ырыс» МҚҰ ұсынылып, 6 азаматтың жобалары облыстық комиссиядан өткен.
4 азаматтың құжаттары несие тарихының дұрыс болмауына байланысты және мал қорасы талапқа сай болмауына орай кері қайтарылған.
Нұрлан ҚОСАЙ