Одан бөлек, биыл өңір халқын таза ауызсумен қамтамасыз ету мақсатында 17 млрд теңгеге 54 жоба іске асырылмақ. 2024-2025 жылдары су құбыры желілерінің 19 жобасын салу жоспарланған. Бұл туралы Абай облысының әкімі Нұрлан Ұранхаев айтты.
Ұранхаевтың айтуынша, былтыр өңірдің қысқамерзімді экономикалық индикаторы 104,9%-ды құраған. Ең үлкен өсім – жұмыс істеп тұрған кәсіпкерлік субъектілерінің санында, ол 120,4%-ға, өнеркәсіп өнімі 109,7%-ға, құрылыс 108,8%-ға, өңдеу өнеркәсібі 106%-ға артқан. Ал негізгі капиталға салынған инвестициялар 8,2%-ға өсіп, 420 млрд теңгені құраған. Ауыл шаруашылығы өнімдерін шығару 473 млрд теңгеге жетсе, бұл өсім мал шаруашылығындағы өндіріс көлемін 4,1%-ға ұлғайту есебінен қамтамасыз етілген.
Абай облысында тіпті пайдалануға берілген тұрғын үй саны да көбейген.
«340 мың шаршы метр тұрғын үй пайдалануға берілді. Өсім арқылы 3 352 отбасы тұрғын үймен қамтылды. 2022 жылдың қорытындысы бойынша орташа айлық жалақы 24,2%-ға өсіп, 260 мың теңгені құрады», – деді Абай облысының әкімі.
Нұрлан Ұранхаевтың сөзінше, облыста биыл небәрі 4 айда құрылыс секторы 159,8%-ға, инвестициялар 112,9%-ға, өңдеу өнеркәсібі 121,3%-ға, тұрғын үйді пайдалануға беру 105,3%-ға, ауыл шаруашылығындағы жалпы өнім 102,7%-ға өскен. Сумен жабдықтау объектілерін қаржыландыру 2,5 есе, жолдарды жөндеуді қаржыландыру 2,3 есе артқан. Тұрғын үй коммуналдық шаруашылығы саласын қаржыландыру 1,4 есеге, әлеуметтік қорғауды қаржыландыру 1,5 есеге көбейген.
«Облыстың әлеуметтік-экономикалық дамуының 2023-2027 жылдарға арналған кешенді жоспарын инвестициялау көлемі – 1,9 трлн теңге. Онда 102 шара қамтылған. 2028 жылға дейін инвестициялық жобалар пулы жасақталды. Оған 6,8 мың жұмыс орны құрылып, 870 млрд теңгеге 43 жоба іске асады. Оның ішінде биыл 1 604 жұмыс орнын ашатын 8 жоба іске асырылып жатыр», – деді
Н. Ұранхаев.2024-2025 жылдары су құбыры желілерінің 19 жобасын салу жоспарда бар.