«Қазақ халқы жалқау, еріншек, қолынан ештеңе келмейді» деген жағымсыз әрі негізсіз айыптауларды тоқтату керек. Жамбыл облысының Қордай ауданына сапармен барған Мемлекет басшысы Қасым-Жомарт Тоқаев осылай қадап айтты. Әйтпесе, Қордайдағы қақтығыстан кейін кейбір блогерлер қазақтардың өзін кінәлап, жалған жала жабумен әуестеніп кеткені белгілі.
1 наурыз – Алғыс айту күні ел Президенті Қордай ауданына жұмыс сапарымен арнайы келді. Ол осы күні тойлаудан гөрі, ауыл тұрғындарымен өзекті мәселелер жөнінде пікір алмасуды жөн көріпті.
– Қордайда болған оқиға халқымызды дүр сілкіндірді, бүкіл әлемді елең еткізді. Шыны керек, бұл жанжал мемлекетімізге нұқсан келтірді. Абыройымызға зияны тиді. Енді тұтас ұлт болып осындай теріс тәжірибеден сабақ алуымыз керек. Ең алдымен, келешекте мұндай қасіретті болдырмау үшін тиісті шара қолдануымыз қажет, – деп атап өтті Қ.Тоқаев.
Мемлекет басшысы Қасым-Жомарт Тоқаев Елбасы Нұрсұлтан Назарбаевтың сарабдал саясаты арқасында Қазақстанның әлем жұртшылығына беделді, абыройлы, қарқынды дамушы ел ретінде танылғанын қордайлықтардың қаперіне салып, ендігі міндет осы жетістіктерді сақтап қалу, оны барынша арттыру екенін нықтады.
Жамбыл облысының жаңа басшылығының алдына аймақтың өсіп-өркендеуін тежейтін кедергілерді жойып, халықтың әл-ауқатын арттыратын шаралар қабылдау міндеті қойылды.
– Қақтығыс болған жерде ешқашан және ешқандай даму болмайды. Бұл – заңдылық. Өкінішке қарай, облыс басшылары бұл заңдылықты дұрыс түсінген жоқ. Сондықтан облыс басшылары, құқық қорғау органдарының басшылары толығымен ауыстырылды, қызметкерлер жұмыстан босатылды. Жаңа басшылар тағайындалды. Солардың арасында Бердібек Сапарбаев бар. Бұл азаматты жақсы танисыздар. Тәжірибесі мол мемлекеттік қызметші. Оның алдында тұрған мақсат – тұрақсыздыққа түрткі болатын жағдайларды түбегейлі жою және өңірдің дамуына серпін беру, – деді Президент.
Оның байламынша, тәуелсіздіктің арқасында қазақ халқы шын мәнінде мемлекет құраушы ұлтқа айналды. Мұның маңызы терең. Ең алдымен, бұл – мемлекетіміздің болашағы үшін ерекше жауапкершілік, қасиетті борыш. Ауыл ақсақалдары осы бағытта жұмыс жүргізіп, елдегі береке-бірлікті нығайтып, жастарымызға дұрыс жол көрсетіп, тәрбие беруі керек.
– Төл халқымыздың шынайы қасиеттері, болмысы қандай болуы керек? Бұл – бірінші кезекте, кеңшілік, жомарттық, жайсаңдық, жасампаздық деген сөз. Біз басқа ұлттарға, өзге елдерге өнеге, үлгі көрсетуіміз керек. Қазақ халқы бейқам, жалқау, еріншек, оның қолынан ешқандай жұмыс келмейді деген жағымсыз әңгімелерді доғару қажет! Бірақ осындай теріс пікірлерді тоқтату үшін өзіміздің еңбекқорлығымызды көрсеткеніміз жөн, – деген Мемлекет басшысы ақсақалдарды ұрпақ тәрбиесінде белсенділік танытуға үндеді.
Президент тергеу жұмыстары заңға сәйкес жүргізілетінін, заң алдында бәрі тең екенін ескертіп, Қордайдағы жергілікті қызметкерлердің пара алуы, шекара арқылы заңсыз сауда жүруі түйткілдерін шешуді тапсырды.
– Ауданда бір топ адам белсенді түрде контрабандамен айналысқан. Бұл – белгілі нәрсе. Осы іске басқа топ та қатысқысы келген. Бір сөзбен айтсақ, заңсыз табыс көзі үшін екі қылмыстық топтың арасында текетірес пайда болған. Бұл тайталас салдарынан көп адам зардап шекті. 11 адам қаза тапты. Оны ашық айту керек. Құқық қорғау органдары алдында тұрған мақсат – барлық қылмыскерлерді ұлтына қарамай, заңға сәйкес жазаға тарту. Онсыз елімізде тәртіп болмайды, – деді Қ.Тоқаев.
Кездесуде Қордай аудандық ардагерлер кеңесінің төрағасы Әбдібек Сейілханов, Жамбыл облысының Құрметті азаматы Төле Сүгірбай сөз сөйлеп, аудандағы әлеуметтік және басқа да мәселелерді шешу жөніндегі ойларды ортаға салды.
– Ұлтаралық татулық – біздің ең басты құндылығымыз. Ендеше оған сызат түсірмеуіміз керек, – деді жиынды қорытындылаған Мемлекет басшысы. Осыдан кейін ол Қаракемер ауылының спорт кешеніне соғып, жас спортшылардың жаттығу барысын көрді. Болашақ спортшыларға табыс тілеп, оларға доп пен бокс қолғабын сыйға тартты.
Ел Президенті Сортөбе ауылындағы мәдениет үйінде дүнген диаспорасының өкілдерімен жеке жүздесті. Қасым-Жомарт Кемелұлы Қазақстан – достықтың, бейбітшілік пен келісімнің мекені, барлық этникалық топтардың ортақ Отаны екеніне екпін түсірді. Еліміз түрлі тарихи жағдайларға байланысты қиын-қыстау заманда мәжбүрлі түрде қазақ жерін паналап келген халықтың бәрін құшақ жая қарсы алғанын еске салды. Мемлекет басшысы Қордай ауданында болған оқиғадан дұрыс қорытынды шығару керек екенін мәлімдеді.
– Қайғылы оқиға артта қалуы тиіс. Алдағы уақытта тату-тәтті, түсіністікте бірге өмір сүреміз. Біз бұдан сабақ алуымыз керек. Бұрын-соңды мұндай жағдай болған емес. Бұл биліктің де жіберген кемшілігі. Сол себепті мен бірден облыс басшылығын, құқық қорғау органдарының жетекшілерін де ауыстырдым, – деді Қ.Тоқаев.
Ол Бердібек Сапарбаев төрағалық ететін үкіметтік комиссия барлық нысандарды қайта қалпына келтіріп, әлеуметтік мәселелерді шешумен айналысатынын жеткізді. Аймақтағы ахуал жіті бақылауда болады.
Қасым-Жомарт Тоқаев дүнген диаспорасын жастарды халықтың мәдениетіне, қазақ тілі мен Қазақстанның мемлекеттік рәміздеріне құрметпен қарауға тәрбиелеуге шақырды.
– Сіздердің балаларыңыз қазақ тілін үйренуі, орыс тілі мен өзінің ана тілін білуі тиіс. Мемлекет мәдениеттеріңіз бен дәстүрлеріңізді сақтап, дамытуға жан-жақты қолдау көрсетеді. Дегенмен сіздер, әсіресе ауылда тұратын азаматтар мемлекеттік тілді білгендеріңіз аса маңызды, – деді оларға Мемлекет басшысы.
Сонымен қатар Президент дүнген жастары үшін жалғыз Қордай ауданының бірнеше ауылында ғана емес, Қазақстанның барлық өңірінде жұмыс істеуіне мол мүмкіндік бар екенін нұсқады.
– Қазақстан – байтақ әрі бай мемлекет. Еліміздің солтүстігінде құнарлы жерлер бар. Біз неге бір жерде ғана тұрақтауымыз керек? Балаларыңызды солтүстікке, шығысқа қарай жіберіңіздер. Солтүстік, батыс, оңтүстік, шығыста сіздердің балаларыңызға жұмыс істеп, ақша табуға мүмкіндік мол, – деді Қ.Тоқаев.
Ол жұртшылықты қайғылы оқиғаның қайталануына жол бермеуге шақырды. Өңірдегі құқық қорғау органдарының жаңа басшылығына қоғамдық тәртіп пен тұрғындардың қауіпсіздігін қамтамасыз ету, сондай-ақ қылмыстың алдын алу жөнінде міндет жүктеді.
Кездесуде Қордай ауданының құрметті азаматы Шисыр Динласон кезінде қамқорлық көрсеткен қазақ халқына қонақжайлылығы мен мейірімі үшін алғыс білдірді. Еңбек ардагері жергілікті дүнгендердің атынан болған оқиғаға өкініш білдіріп, кешірім сұрады. Сортөбе ауылдық мектебінің қазақ тілі мен әдебиеті пәні мұғалімі Эдик Суларов жергілікті балаларға мемлекеттік тілді, Қазақстан тарихын, қазақ халқының салт-дәстүрін оқытуға ұмтылатынын білдірді.
Кездесу соңында Қазақстан Президенті Қаракемер, Масаншы және Сортөбе ауылдарындағы қоғамдық тәртіпті қамтамасыз ететін Арнайы жедел әрекет ету жасағының жауынгерлерімен, Ұлттық гвардияның әскери қызметшілерімен әңгімелесті.
Ерік ЕРДЕН
Кездесуде Қордай аудандық ардагерлер кеңесінің төрағасы Әбдібек Сейілханов, Жамбыл облысының Құрметті азаматы Төле Сүгірбай сөз сөйлеп, аудандағы әлеуметтік және басқа да мәселелерді шешу жөніндегі ойларды ортаға салды.
– Ұлтаралық татулық – біздің ең басты құндылығымыз. Ендеше оған сызат түсірмеуіміз керек, – деді жиынды қорытындылаған Мемлекет басшысы. Осыдан кейін ол Қаракемер ауылының спорт кешеніне соғып, жас спортшылардың жаттығу барысын көрді. Болашақ спортшыларға табыс тілеп, оларға доп пен бокс қолғабын сыйға тартты.
Ел Президенті Сортөбе ауылындағы мәдениет үйінде дүнген диаспорасының өкілдерімен жеке жүздесті. Қасым-Жомарт Кемелұлы Қазақстан – достықтың, бейбітшілік пен келісімнің мекені, барлық этникалық топтардың ортақ Отаны екеніне екпін түсірді. Еліміз түрлі тарихи жағдайларға байланысты қиын-қыстау заманда мәжбүрлі түрде қазақ жерін паналап келген халықтың бәрін құшақ жая қарсы алғанын еске салды. Мемлекет басшысы Қордай ауданында болған оқиғадан дұрыс қорытынды шығару керек екенін мәлімдеді.
– Қайғылы оқиға артта қалуы тиіс. Алдағы уақытта тату-тәтті, түсіністікте бірге өмір сүреміз. Біз бұдан сабақ алуымыз керек. Бұрын-соңды мұндай жағдай болған емес. Бұл биліктің де жіберген кемшілігі. Сол себепті мен бірден облыс басшылығын, құқық қорғау органдарының жетекшілерін де ауыстырдым, – деді Қ.Тоқаев.
Ол Бердібек Сапарбаев төрағалық ететін үкіметтік комиссия барлық нысандарды қайта қалпына келтіріп, әлеуметтік мәселелерді шешумен айналысатынын жеткізді. Аймақтағы ахуал жіті бақылауда болады.
Қасым-Жомарт Тоқаев дүнген диаспорасын жастарды халықтың мәдениетіне, қазақ тілі мен Қазақстанның мемлекеттік рәміздеріне құрметпен қарауға тәрбиелеуге шақырды.
– Сіздердің балаларыңыз қазақ тілін үйренуі, орыс тілі мен өзінің ана тілін білуі тиіс. Мемлекет мәдениеттеріңіз бен дәстүрлеріңізді сақтап, дамытуға жан-жақты қолдау көрсетеді. Дегенмен сіздер, әсіресе ауылда тұратын азаматтар мемлекеттік тілді білгендеріңіз аса маңызды, – деді оларға Мемлекет басшысы.
Сонымен қатар Президент дүнген жастары үшін жалғыз Қордай ауданының бірнеше ауылында ғана емес, Қазақстанның барлық өңірінде жұмыс істеуіне мол мүмкіндік бар екенін нұсқады.
– Қазақстан – байтақ әрі бай мемлекет. Еліміздің солтүстігінде құнарлы жерлер бар. Біз неге бір жерде ғана тұрақтауымыз керек? Балаларыңызды солтүстікке, шығысқа қарай жіберіңіздер. Солтүстік, батыс, оңтүстік, шығыста сіздердің балаларыңызға жұмыс істеп, ақша табуға мүмкіндік мол, – деді Қ.Тоқаев.
Ол жұртшылықты қайғылы оқиғаның қайталануына жол бермеуге шақырды. Өңірдегі құқық қорғау органдарының жаңа басшылығына қоғамдық тәртіп пен тұрғындардың қауіпсіздігін қамтамасыз ету, сондай-ақ қылмыстың алдын алу жөнінде міндет жүктеді.
Кездесуде Қордай ауданының құрметті азаматы Шисыр Динласон кезінде қамқорлық көрсеткен қазақ халқына қонақжайлылығы мен мейірімі үшін алғыс білдірді. Еңбек ардагері жергілікті дүнгендердің атынан болған оқиғаға өкініш білдіріп, кешірім сұрады. Сортөбе ауылдық мектебінің қазақ тілі мен әдебиеті пәні мұғалімі Эдик Суларов жергілікті балаларға мемлекеттік тілді, Қазақстан тарихын, қазақ халқының салт-дәстүрін оқытуға ұмтылатынын білдірді.
Кездесу соңында Қазақстан Президенті Қаракемер, Масаншы және Сортөбе ауылдарындағы қоғамдық тәртіпті қамтамасыз ететін Арнайы жедел әрекет ету жасағының жауынгерлерімен, Ұлттық гвардияның әскери қызметшілерімен әңгімелесті.
Ерік ЕРДЕН
