Әсіресе, «Ауыл Аманаты» бағдарламасы бойынша ауылдағы ағайынның табысын арттыру мақсатында өңірде 1,2 млрд теңге сомасында қаржы бөлінген. Бұл қаржыға өңірдің ауылды аймақтарында жаңа бизнес-жобаларды ашу және қолда бар бизнесті кеңейту үшін 250-ге жуық кәсіп ашуға бел буған азаматқа қарыз беру және жаңадан 265 жаңа жұмыс орнын ашу көзделіпті. Әрбір адамға берілетін қарыз сомасы шамамен 4,8 миллион теңге көлемінде болмақ.
Бұл мақсатта осыған дейін бірнеше бағдарламаның жүзеге асырылуына мұрындық болған KOKSHE әлеуметтік-кәсіпкерлік корпорациясы таңдап алынған. Бағдарламаларды ұйымдастырушылардың мәліметінше, жылдық пайызы 2,5 пайыздан аспайтын шағын несие беру мерзімі 5 жылға, егер мал шаруашылығы саласында болса 7 жылға берілмек. Шағын несиенің ең жоғары көлемі 2,5 мың айлық есептік көрсеткішке дейін, яғни 8,6 миллион теңгеге дейін болмақ.
Ауылды аймақта кәсіп ашуға ниеттенген азаматтар үшін шағын несиелеу етті және сүтті мал шаруашылығы, жылқы және қой өсіру кәсібін дамыту, көкөніс егу сияқты ауыл шаруашылығының барлық түрлері қамтылмақ. Бағдарламаның тиімді жүзеге асырылуын қамтамасыз ету үшін облыстың әр ауданында құрамына аудан әкімінің орынбасарлары ауылдық округ әкімдері, «AMANAT» партиясы, ауыл шаруашылығы, жер қатынастары, кәсіпкерлер палатасы, сәулет және қала құрылысы, «Азаматтарға арналған үкімет» мемлекеттік корпорациясының өкілдерінен құралған жұмыс топтары құрылған.
«Ауыл Аманаты» партиялық жобасының жүзеге асырылу сапасын бақылау мақсатында бағдарламаның орындалуы «AMANAT» партиясының «Халықпен бірге» сайлауалды бағдарламасының Жол картасына кірген. Жалпы, өңірде 2023-2027 жылдар аралығында аталған бағдарлама бойынша 9,3 миллард теңге сомасында қаржы бөліп, 1 147 шағын несие беру және 1 216 жаңа жұмыс орнын құру жоспарланыпты.
Облыста партияның «Құқықтық көмек» жобасы бойынша да жүйелі жұмыс жүргізілгені байқалады. Тек осы жылдың алғашқы жарты жылдығында ғана партияның қоғамдық қабылдауына 1 459 өтініш түсіп, оның 57 пайызы оң шешімін тапқан. Қалған 41 пайызы бойынша түсіндіру жұмыстары жүргізілсе, 2 пайызының орындалуы партияның тікелей бақылауына алынған.
Партия филиалының мәліметінше, түскен арыз-шағымдардың басым бөлігі, яғни 38 пайызы тұрғын үй-коммуналдық шаруашылық мәселелері бойынша болған. Мұнымен қоса, тұрғындарды электрмен қамту, ауызсу, елді мекендерді абаттандыру, жылумен қамту мәселелері алаңдатады. Әлеуметтік қамту, материалдық көмек беру, мүгедектігі бойынша жәрдемақы алу сияқты өтініштер де көбейген. Аталған өтініштердің 75 пайызы оң шешімін тауыпты.
Халықтың құқықтық көмек беру мақсатында тақырыптық қабылдаулар ұйымдастырылып, апта сайын заңгерлер, нотариустар мен адвокаттардың қатысуымен қабылдаулар өткізілген. Жалпы, «Заңгерлік көмек» жобасы аясында 53 қабылдау өткізіліп, нәтижесінде 99 азаматқа консультативтік көмек көрсетілген. Сондай-ақ жоба шеңберінде 95 рет көшпелі қоғамдық қабылдау өткізіліп, 175 адам қабылданған. Партия филиалының қоғамдық қабылдауының жетекшісі тұрғындар тарапынан түсінбеушіліктердің де болып жататынын жасырмады.
– Мемлекеттік тұрғын үй қорынан азаматтарды тұрғын үймен қамту небәрі 8 пайызды ғана құрайды. Адамдарға партияның заң аясында ғана жұмыс істейтінін түсіндіру қиынға соғады. Сондықтан уақытша шараларды іздеуге тырысамыз. Өңірдің әр ауданында қоғамдық қабылдаулар қызмет етеді. Біздің негізгі міндетіміз - азаматтардың өтініштеріне дереу үн қатып, мәселенің шешілуіне көмектесу. Қазір өтініштерді бақылаудың электронды жүйесі де жұмыс істеп тұр. Жергілікті атқарушы органдар тарапынан азаматтардың құқықтары бұзылып, қағазбастылыққа жол берілсе, мәселе партияның бақылау комиссиясына тапсырылып, олар оқиға орнына барып, партиялық жауапкершілік туралы шешім қабылдайды. Ешқандай өтініштер қараусыз қалдырылған жоқ. Өтініштер онлайн және офлайн түрде де қабылданады, – дейді «AMANAT» партиясы Ақмола облыстық филиалының қоғамдық қабылдау меңгерушісі Ақманат Әлімбетова.
Партияның қоғамдық қабылдауына түскен арыз-шағымдардың бірқатары демеушілердің көмегі есебінен шешіліп жататыны да анықталды. Мәселен, Бұланды ауданы партиялық филиалының қоғамдық қабылдауына келген Воробьевка селосының тұрғыны Татьяна Шевченконың айтуынша, 60-қа жуық бала тұратын ауылда бірде-бір спорт және балалар ойын алаңы жоқ. Партия филиалының төрағасы Раушан Хожабайдың ықпалымен ABU-Agro ЖШС-ның басшысы Өміржан Байғалиев өз есебінен 20 миллион теңге сомасына балалар ойынын және спорт алаңын орнатып берген. Жылдар бойы қордаланған мәселелері шешімін тапқан азаматтар партия қатарына өтуге де ниеттерін білдіріп, 75 адам партия қатарына мүшелікке қабылданған.
Мүмкіндігі шектеулі жандарға қамқорлық көрсетуге бағытталған «Кедергісіз келешек» партиялық жобасының орындалуында да бірталай маңызды істердің басы қайырылған.
Партия филиалының мәліметінше, ерекше қажеттіліктері бар адамдарды толықтай бейімдеуді қамтамасыз ету үшін 192 әлеуметтік инфрақұрылымда жұмыс жүргізу жоспарланған. 1 маусымда партияның «Халықпен бірге» сайлауалды бағдарламасы шеңберінде көру, есту, тірек-қимыл жүйесі бұзылған кембағал балаларға қайырымдылық шара ұйымдастырылған. Облыстық жұмыспен қамту және әлеуметтік бағдарламаларды үйлестіру басқармасымен Сарыарқа шағынауданында республикалық бюджет есебінен 150 орындық мүгедектерді оңалту орталығының құрылысына жобалық-сметалық құжаттама әзірленіпті. Бұған қоса, әлеуметтік және көліктік инфрақұрылымның 94 нысаны бейімделгені анықталды.
Жалпы, партиялық жобалардың жүзеге асырылуы өңірдің әлеуметтік-экономикалық дамуына да тың серпін бергені байқалады.
Абзал АЛПЫСБАЙҰЛЫ,
Ақмола облысы