20 шілде күні сағат 18:52-де Көкшетау полиция басқармасының кезекші бөліміне медицина қызметкерлерінен "ЖБМЖ, мидың шайқалуы, төменгі жақтың сынуы, төменгі еріннің жаралары" диагнозымен зардап шеккен кәмелетке толмаған баланың ауруханаға жеткізілгені туралы хабарлама түскен.
Оқиға орнына барған тәртіп сақшылары орталық базар аумағында 5 жасар баланы көлік қағып кеткені анықталды.
Жол-көлік оқиғасына кінәлі азамат – Солтүстік Қазақстан облысының 49 жастағы тумасы. Тексеру барысында Toyota Avensis жүргізушісі базар аумағынан шығып бара жатып, баланың жолға қалай жүгіріп шыққанын көрмегені және соққының салдарынан нәрестені артқа қарай лақтырып жібергені анықталды. Ата-анасы баланың алдында жүріп келген.
Осы фактіге қатысты полицейлер ҚР Қылмыстық кодексінің 345-бабы ("Көлік құралдарын басқаратын адамдардың жол жүру немесе көлік құралдарын пайдалану ережелерін бұзуы") бойынша сотқа дейінгі іс жүргізуді бастады. Сараптама тағайындалды.