ВВС-дің хабарлауынша, Пәкістанда Жамиат Улема Ислам-Фазл (JUI-F) ислам партиясының сайлауалды митингі кезінде болған күшті жарылыстан 44 адам қаза тапты.
Басқа да дереккөздердің мәліметінше, зардап шеккендер саны 200-ге жетуі мүмкін. Ауданды қоршауға алған қауіпсіздік қызметі құрбандар саны одан көп болуы ықтимал екенін ескертті, себебі митингке 500-ге жуық адам қатысқан.
Жергілікті билік өкілдерінің хабарлауынша, жарылыс салдарынан JUI-F аймақтық көшбасшысы Маулана Зиаулла да мерт болды. Жарылыс ол жақтастарына сөз сөйлеп жатқан кезде болған.
JUI-F – ірі діни саяси партия. Ол Пәкістан парламентіндегі үкімет коалициясының құрамына кіреді. Хар қаласындағы митинг елде биыл күзде өтуі керек жалпыұлттық парламент сайлауы қарсаңында ұйымдастырылды.
Фото: AFP