Н.Островский атындағы облыстық драма театрында «Мерейлі отбасы» байқауының жеңімпаздарын салтанатты түрде марапаттау шарасы өтті. Салтанатты кеште БҚО әкімі Нариман Төреғалиев сөз сөйледі.
– Елімізде ырысы мен ынтымағы жарасып, ауызбіршілігі көпке үлгі болып жүрген отбасылар баршылық. Осындай үлгілі жанұяларды дәріптеу мақсатында жыл сайын «Мерейлі отбасы» ұлттық байқауы өткізіледі. Қоғамдағы әр отбасы босағасының беріктігі – мемлекет іргетасының кепілі. Халқымыз қашанда отбасын қасиетті құрылым ретінде қабылдаған. «Ел болам десең, бесігіңді түзе» деп отбасындағы ұрпақ тәрбиесінің маңызын бағамдаған. Бұл ұлттық байқау ұрпақтар сабақтастығын, елге қызмет етудің ең озық үлгісін көрсететін сайыс болуымен де қоғам алдындағы құндылығы арта түспек. Жалпы, биыл елімізде отбасы институтын нығайту, баланы қорғау және тұрмыстық-зорлық зомбылықтың алдын алу саласындағы мемлекеттік саясатты іске асыру бойынша нормативтік-құқықтық және институционалдық база құрылды, – деді аймақ басшысы Нариман Төреғалиев.
«Мерейлі отбасы» ұлттық байқауының облыстық кезеңіне қатысу үшін 200 отбасы өтініш білдіріпті. Солардың ішінен 21 отбасы облыстық кезеңге жолдама алған. Олардың бәрі түгел аймақ басшысының қолынан сыйлық пен арнайы алғысхаттар алды.
Байқаудың облыстық кезеңінде бірінші орынды Казталов ауданынан келген Ниетқабыловтар отбасы иемденді. Ал екінші орын Орал қаласында тұратын Өтебаевтар әулетіне бұйырса, үшінші орынды Сырым ауданынан келген Қажиахметовтер отбасы қанжығасына байлады.
Бағы жанып, бірінші орынды алған Ниетқабыловтар отбасының отанасын сөзге тарттық.
«Біз қарапайым шаруа отбасымыз. Өмір бойына мал бақтық. Малдың еті мен сүтін азық етіп келе жатқан қазақтың қарапайым отбасымыз. Бүгін байқауға қатысқанымызға өте қуаныштымыз, үйдегі келіндер өздері әзірледі ғой, біз тек дайындалып шыға қойдық», – дейді бақыттан жүзі бал-бұл жанған Нұржамал әже.
Бұл көпбалалы отбасы. Үйдің отағасы Сағынгерей Қарекенов пен жұбайы Қарекенова Нұржамалдың отасқандарына 46 жыл болыпты.
«Бес бала тәрбиелеп өсірдік, бүгінде немере-жиендердің қызығын қызықтап жүрген жайымыз бар», – дейді үйдің иесі Сағынгерей ақсақал.
Олар 2010 жылы «Сағынгерей» шаруа қожалығын ашқан. Отбасында бәрі – еңбек адамдары.
– Күніне сиыр сауып, сүт тартып, оның өнімін дайындаймыз. Келін екеуіміз кезектесіп жасаймыз. Күніне 300-400 құрт жасап, сатылымға шығарамыз. Біздің өнімдерді Ресей де сатып алады, – дейді Нұржамал апай.
Байқауда екінші орын иеленген Өтебаевтар отбасы – әскери қызметшілер. Отағасы Ғалымжан Өтебаев та, жары Зылиха Оразаева да Орал қаласындағы 5517 әскери бөлімінде қызмет атқарады. Көпбалалы жанұя.
Ал үшінші орын алған отбасы – 100 жылдан астам уақыт бойына қаламды серік еткен журналистер династиясы. Бұл әулеттің отағасы Махмет Қажияхметов – облысқа танымал журналист, ақын. Жұбайы Ботагөз Нұғманова – аудандық газетте корректор болып қызмет атқарған адам. Бүгінде журналистік қызметті отбасының бала-келіндері жалғастырып жүр. Отбасының журналистика саласындағы еңбек өтілі 107 жылды құрайды екен.
Байқау жеңімпаздарына жақсы қаржылай сыйлық берілді. Атап айтсақ, 1 орынға 1 миллион теңге, екінші орынға 700 мың теңге, үшінші орынға 500 мың теңге табыс етілді. Ең үздік шыққан Ниетқабыловтар отбасы енді Астана қаласында өтетін республикалық байқауда өңір намысын қорғайтын болады.
Жанат ҚАЙЫРҒОЖИНА,
Батыс Қазақстан облысы