Оған партия жанындағы «Жастар Рухы» жастар қанатының төрағасы Нұржан Жетпісбаев және студенттік омбудсмен Айсұлу Ерниязова қатысты.
«Жастар Рухының» төрағасы Нұржан Жетпісбаевтың айтуынша, кейінгі 3 жылда партия мен жастар қанаты студенттердің жатын орны мәселесін жүйелі көтеріп, шешіп келеді. Студенттердің өмір сүру жағдайын жақсарту мәселесі – партияның «Халықпен бірге!» сайлауалды бағдарламасында қамтылған негізгі басымдықтардың бірі.
«Ел жастарының басым бөлігі – студенттер. Бүгінде олардың саны 1 милионнан асады. Партияның сайлауалды бастамаларын жүзеге асыру аясында сұранысқа ие бағыттар бойынша жоғары білім алуға арналған гранттар саны 2025 жылға қарай 1,5 есе өседі. Сонымен қатар партияның сайлауалды бастамалары жастарға жатақхана жетіспеушілігі мәселесін де қамтыды. 2027 жылға дейін жыл сайын ел аумағындағы жатақханаларда 10 мың төсек-орын қалыптастыру жоспарлануда», – деді жастар қанатының төрағасы.
Орын тапшылығы мәселесінен бөлек, жыл сайын тамыз-қыркүйек айларында жатақханалардың санитарлық нормаларға сай келмеуі проблемасы шиеленісе түседі. Осы мәселелердің алдын алу мақсатында жыл сайын жаңа оқу жылы қарсаңында жастар қанаты ел аумағындағы барлық жатақханаға мониторинг жүргізеді.
«14 тамыздан бері жастар қанаты депутаттық корпуспен, жастарды қолдау кеңесінің мүшелерімен, жергілікті атқарушы органдармен, өңірлік Төтенше жағдайлар департаментімен және жастар ұйымдарымен бірге ел аумағындағы ЖОО мен ТжКБ жатақханаларына жаппай мониторинг жүргізіп жатыр. Осы уақыт аралығында білім ордалары мен колледждердің 237 жатақханасы тексерілді. Жоғары оқу орындарындағы жатақханалардың 70-і – жақсы, 39-ы – орташа жағдайда. 2 жатақханада құрылыс жұмысы жүргізіліп жатыр. Ал колледждердегі 126 жатақхананың 75-і – жақсы, 36-сы – орташа, 13-і – нашар жағдайда. 2 жатақханада құрылыс жұмысы жүріп жатыр. Апта соңына дейін тағы 426 жатақхана тексеріледі», – деді Нұржан Жетпісбаев.
Мониторинг барысында 11 жатақханада санитарлық және қауіпсіздік нормаларының сақталмауы, су крандарының жұмыс істемейтіні, сынық кафельдер, оқу залдарының өз мақсатында пайдаланылмауы, студенттердің бос уақытын тиімді өткізуге арналған орындардың болмауы анықталды. Олардың арасында «С.Жандосов атындағы Қаскелең кәсіптік-техникалық колледжі», «Петропавл жоғары құрылыс-экономикалық колледжі», «Теміртау кәсіптік-техникалық колледжі», «Ө.Байқоңыров атындағы Жезқазған университеті», «Ақмешіт» гуманитарлық-техникалық институты» және өзге да жоғары оқу орындары мен колледждердің жатақханалары бар.
Сондай-ақ партияның баспасөз алаңында студенттік омбудсмен Айсұлу Ерниязова сөз сөйлеп, атқарылып жатқан жұмыстарға тоқталды.
«Омбудсмен институты Ғылым және жоғары білім министрінің бастамасымен 2022 жылы қыркүйекте құрылды. Студенттердің құқығы жөніндегі уәкіл білім алушылардың құқығын қорғаумен, олардың мүддесін ілгерілетумен айналысады. Бұл институтты енгізудің уақыты жеткені мен қажеттілігін көрсеткен бірінші жағдай – жыл басында жатақханаларды бөлу кезіндегі дағдарыс. Көп жағдайда студенттер өз құқығының бұзылғанын айтып, шағымданудан жасқанады. Сондықтан біз барлық аймақта жауапты омбудсмендерді бекіттік. Олар өңірлердегі студенттерге толық қамқорлық жасап, партияның жастар қанатымен бірге жатақханаларда мониторинг жүргізу жұмысына белсенді араласады. Бірлесіп студенттердің құқығын қорғаймыз, олардың талап-тілегін орындаймыз деген сенімдімін», – деді омбудсмен.
Еске сала кетейік, жатақханаларда мониторинг жүргізу жұмысы ел аумағында қарқынды жүріп жатыр. Бүгін бұл жұмыс елордада басталады. Жастарды кеңінен қамту, сондай-ақ студенттерге қатысты құқықбұзушылықтарды немесе жатақханалардың норма сәйкес келмеуін анықтау үшін арнайы жедел желі іске қосылды. Әрбір қазақстандық студент келесі нөмірлер бойынша өз өтініш-тілегімен жүгіне алады:
Студентік омбудсмен: instagram: @aisulu818
Ғылым және жоғары білім министрлігіндегі ахуалдық орталық – Сall-центр +77002551443.
«Жастар Рухы»: +7 776 558 4439 (watsapp), немесе Instagram әлеуметтік желісіндегі @jastar_ruhy аккаунты.