Өйткені олар қарағандылық «Майқұдық ҚҚ «СҮ»-ге 2 млрд 610 млн теңге қарыз. Нәтижесінде, фабриканың қызметі тоқтап, 200-ге жуық адам жұмыссыз қалды.
Айта кету керек, «Майқұдық ҚҚ «СҮ» – 2022 жылы өңір бойынша «Сенімді салық төлеуші» және «Сенімді өндіруші» номинациялары бойынша үздік деп танылған компания. Компания құрылымында жер қойнауын пайдаланушы өзге де кәсіпкерлік субъектілері бар.
2022 жылғы 17 тамызда «Майқұдық ҚҚ «СҮ» ЖШС мен «АрселорМиттал Теміртау» АҚ арасында №4600025567 келісімшарт жасалған. 2022-23 жылдары «KAZ Феррит» ЖШС өндірілген көмір концентратын «Арселорға» осы келісімшарт шеңберінде жөнелтіп отырды. «АрселорМиттал Теміртау» АҚ тарапынан концентраттың сапасы, жеткізу мерзімі немесе шарттың басқа талаптары бойынша бірде-бір ескерту болмаған. Келісімшарт 2023 жылдың аяғына дейін жасалғанына қарамастан, «АрселорМиттал Теміртау» АҚ концентрант алуды маусым айынан бастап ешқандай түсіндірусіз тоқтатып тастаған. Бұл жағдай «KAZ Феррит» фабрикасының қызметін тоқтатуға, салық аударымдарын кешіктіруге, жұмыссыздыққа алып келді.
Бір қызығы, «АрселорМиттал Теміртау» АҚ қазір шетелден көмір концентратын сатып алып отыр. Ал жоғары сапалы және қажетті көлемде өнім шығаратын отандық зауыт жабылғалы тұр.
Сондай-ақ «АрселорМитталТеміртау» компаниясы «Майқұдық ҚҚ «СҮ»-ге 33 тонна концентратты сатып алғаны үшін 2 млрд 610 млн теңге қарыз.
– Биылғы шілде айынан бастап кәсіпорын өз қызметін тоқтатуға мәжбүр болды. Барлық ұжым ақысыз еңбек демалысына жіберілді. Зауыттың жабылуы 200-ден астам жұмыскер мен олардың отбасыларының материалдық әл-ауқатына кері әсерін тигізеді, көп жұмысшының несиесі бар, – дейді «Kaz Феррит» ЖШС директоры Бекжан Көпбаев.
Негізінде, келісімшартта тауар жеткізілу уақыты тайға таңба басқандай жазулы тұр. Дегенмен бұл келісімді Митталдың компаниясы орындамай отыр.
– «АрселорМитталТеміртау» АҚ тауар жеткізілген күннен бастап 25 күнтізбелік күн ішінде төлем жүргізуге міндетті. Мерзімі өткен берешек туралы жүйелі түрде хаттар жіберілді. Берешекті ерікті түрде өтеуден бас тартқан жағдайда сотқа талап-арызбен жүгінетініміз туралы хат жолдадық, – дейді «Майқұдық ҚҚ» СҮ» ЖШС директоры Дулат Нұрғалиев.
«Өнеркәсіптік саясат туралы» заңға сәйкес, мемлекеттің ынталандыру шараларының бірі – ішкі нарықты қолдау, отандық өндірісті дамыту. Кәсіпорын ұжымы мемлекет бұл жағдайға шұғыл араласуы тиіс деп есептейді.
«АрселорМиттал Теміртау» АҚ қазақстандық қамту туралы нормаларды орындап, отандық өндірушілерді қолдауы тиіс. Келісімшартты керек қылмаған, отандық өндірушілерді қолдау орнына уақытында ақшасын төлемей зар илеткен компанияны екі кәсіпорын – «Майқұдық ҚҚ «СҮ» мен «KAZ Феррит» ЖШС сотқа бермек.
Әдебиет БЕЛГІБАЙҰЛЫ
Фото: azattyq-ruhy.kz