Жоспар нақтыланбай, мақсат айқындалмайды. Өткенге көз жүгіртпей, болашаққа бет бұру мүмкін емес. Қасым-Жомарт Кемелұлы әр Жолдауында дамудың жаңа бағыттарын белгілеп, экономиканы көтеруге ерекше көңіл бөліп келеді. Бұл ең алдымен, халықтың әлеуметтік жағдайын күшейтуге ықпал етуде.
Жасыратыны жоқ, Мемлекет басшысы белгілеп берген бағыттардың басым көпшілігі жүзеге асты. Мәселен, 2020 жылдан бері мұғалімдердің жалақысы екі есе өсті. Дәрігерлердің айлығы да айтарлықтай көбейді. Қазір олардың табысы еліміздегі орташа жалақыдан әлдеқайда жоғары. Жұртқа зейнетақы жинағының бір бөлігін пайдалану мүмкіндігі берілді.
Сондай-ақ игерілмей жатқан немесе заңсыз берілген 8 миллион гектар жер мемлекет меншігіне қайтарылды. Бұл бағытта «AMANAT» партиясы жанындағы «Жер аманаты» комиссиясының жұмысын айтпай кетпеске болмас. Біздің өңірде аталған комиссияның күшімен өткен жылы 200 мыңнан аса гектар жер мемлекет меншігіне қайтарылса, биыл жыл басынан бері 94 мың гектар жер қайтарылды. Ал келесі жылдың соңына дейін игерусіз жатқан тағы 106 мың гектар жер қайтарылмақ.
Расында, Мемлекет басшысы ұсынған жаңа саяси құжаттың мән-маңызы айрықша. Себебі оның арқалайтын жүгі бір жылмен шектелмейді. Ауқымы кең, мазмұны да бөлек. Онда еліміздің экономикалық бағдары анық көрсетілген. Қасым-Жомарт Тоқаев ел экономикасын ілгерілетуде ауыл-аймақты дамытуға ден қойып отыр. Бұл бағытта да Үкіметке «Ауыл аманаты» жобасын ары қарай да жандандыру туралы нақты тапсырмалар жүктеді.
Біздің өңірден бастау алған тың бастаманың қазіргі аяқ алысы жаман емес. Бүгінгі күні облыста аталған жоба аясында жоспарланған қаражаттың 11,5 млрд теңгесі аударылып несиелерді мақұлдау және есепшоттарға аудару процесі жүруде.
Ауыл шаруашылығын дамыту – негізгі мәселелердің бірі. Осы саладағы ахуал мемлекетіміздің азық-түлік қауіпсіздігіне тікелей әсер ететіні белгілі. Президент Жолдауында бұл мәселеге тектен-тек тоқталған жоқ. Себебі ауыл шаруашылығы өнімдерін өңдеу көлемін және оның қосымша құнын арттыру қажет.
Халқымыз «Судың да сұрауы бар» деп бекер айтпаған. Су дегеніміз – үнемдеп пайдаланбаса, тез таусылатын шектеулі ресурс. Онсыз шаруалардың күні қараң. Жолдауда Мемлекет басшысы бұл мәселеге де баса назар аударып, 20 жаңа бөген салу, кемінде 15 су қоймасына күрделі жөндеу жүргізу және 3500 шақырымдық каналды жаңғыртып, цифрлық тәсілмен бақылауға алу керектігін жеткізді.
Президент айтқан бастамалар партия назарында болады. Партияның сайлауалды бағдарламасында Байзақ ауданында «Ақмола», Меркі ауданында «Андас-1», «Андас-2», «Андас-3», Қордай ауданында «Қалғұтты», «Ырғайты» су қоймаларының құрылысын жүргізу қаралған. Сонымен қатар қазір қолданыстағы Жуалы ауданындағы «Теріс-Ашыбұлақ», Қордай ауданындағы «Қарақоңыз», Сарысу ауданындағы «Ынталы» қоймалары жаңғыртылатын болады. Бұл жұмыстар алдағы уақытта партияның қатаң бақылауына алынбақ.
Жолдауда Мемлекет басшысы «AMANAT» партиясының «Қарызсыз қоғам» жобасын ерекше атап өтті. Үкіметке партиямен бірлесіп, оның ауқымын кеңейтуді тапсырып, жобаның игілігін бүкіл еліміз көруі қажеттігін баса айтты. Бұл жоба біздің өңірде де табысты әрі нәтижелі іске асып жатқанын айта кеткен жөн. Айталық, мамыр айынан бері облыстағы 10 ауданның 95 ауылында 7 мыңнан аса азамат оқуға тартылды.
Оқу барысында азаматтарымыз қаржылық мәселелерді шешу, ағымдағы несиелерді азайту, қолма-қол ақшаны басқару және шығындарын оңтайландыру секілді қаржылық басқаруды жан-жақты меңгеріп шықты. Сондай-ақ жаңадан бастаған кәсіпкерлерге бюджетін қалыптастыру, салық есептілігі және қолданыстағы бағдарламалар мен мемлекеттік қолдау бойынша қаржыландыру шарттарын тиімді пайдалану мақсатында 350 бизнес-жоспар дайындауға көмек көрсетілді.
Еліміздің бүгінгі күнге дейін жеткен жетістігі аз емес. Әлемдік аренада ойып тұрып өз орнымызды нақтыладық. Дегенмен еліміздің басты байлығы береке-бірлігімізде жатыр. Сондықтан бабалар аманатына адалдық танытып, табанды еңбек етуіміз қажет.
Дауыл Бейсенқұлов,
«AMANAT» партиясы Жамбыл облыстық филиалының төрағасы