Халқының саны бар болғаны 691,1 мың адамды құрайтын өңір үшін, әрине, көрсеткіш азғантай емес. Бұл еңбек орындарында тіркелген ресми дерек қана, ал тіркелмегені қаншама?
Облыс билігі жұмыссыздықпен күресудей-ақ күресіп жатыр. Бірақ елде екі қолға бір күрек таппай сенделіп жүргендер саны азаймай отыр. Статистикаға сүйенсек, жұмыссыз ретінде тіркелген 17 524 адамның 6 219-ы – жастар. Бұл – басқарманың берген мәліметі.
Қазір облыста жұмыссыздардың санын азайту бағытында бірқатар мемлекеттік бағдарламаға жастарды тарту шаралары жүргізіліп жатыр.
– Бұл бағытта облыста мемлекет тарапынан субсидияланатын жұмыс орындары – әлеуметтік жұмыс орны, жастар практикасы, қоғамдық жұмыс орны, «Алғашқы жұмыс орны», «Күміс жас», «Ұрпақтар келісімшарты» жобалары, сонымен қатар қайтарымсыз негізде берілетін грантты атап өткен жөн, – дейді БҚО Жұмыспен қамтуды үйлестіру және әлеуметтік бағдарламалар басқармасының бөлім басшысы Асан Нарымбаев.
Облыс бойынша биыл әлеуметтік жұмыс орындары бағдарламасы негізінде 562 адам жұмысқа орналасыпты.
Әлеуметтік жұмыс орны – азаматтарды жұмыспен қамтып қоймай, сонымен қатар жұмыс берушілерге жалақы төлеуге кететін шығынын қысқарту арқылы мемлекеттік қолдаудың бір инструменті.
Ал жастар практикасы 35 жасқа толмаған жастарды жұмыспен қамтуға арналған. Бұл – оқуды жаңа бітірген жастар үшін тиімді жоба. Биыл бұл бағдарлама аясында 849 жас маман жұмысқа орналасқан. Жыл аяғына дейін 1704 адамды жұмысқа орналастыру көзделіп отыр. Жастарды жұмысқа орналастыруда «Алғашқы жұмыс орны» жобасы да айтарлықтай оң әсерін беріп отыр. Мамандардың айтуынша, биыл осы жоба арқылы 179 жас маман жұмысқа тұрыпты.
Арнайы білімі жоқ, кәсіби даярлығы жоқ адамдарды қоғамдық жұмыстарға тарту шарасы да бар. Биыл аймақта 4 422 адам қоғамдық жұмысқа тартылыпты. Ерекшелігі – жұмысты толық емес жұмыс күні шарттарында немесе икемді кесте бойынша ұйымдастыру және арнайы білімі жоқ адамдарға уақытша жұмысқа орналасуға мүмкіндігі беріледі.
Еліміз бойынша жұмыс істеп тұрған «Күміс жас» және «Ұрпақтар келісімшарты» жобаларын да айта кеткен жөн. «Ұрпақтар келісімшарты» жобасы бойынша бар болғаны 5 адам жұмысқа тұрыпты, ал «Күміс жастың» игілігін 331 адам көрген. «Күміс жас» жобасы – жасы 50-ден асқан адамдарды жұмысқа орналастыруды көздейтін жоба.
Биыл аймақта 317 адам қайтарымсыз грант алып үлгерген. Бұл жоба аясында кәсіп бастағысы келіп жүргендерге мемлекет тарапынан қаржылай қолдау көрсетіледі. Бастысы, заманауи, жаңашыл идеяң болса болғаны.
– Аталған гранттар 2022 жылдан бастап тек әлеуметтік осал топтарға ғана берілуде. Жаңа бизнес идеяларды іске асыруды көздейтін жобаларға мемлекет тарапынан қайтарымсыз негізде 400 АЕК немесе 1 млн 380 мың теңгеге дейін мемлекеттік қайтарымсыз гранттар берілуде, – дейді БҚО Жұмыспен қамтуды үйлестіру және әлеуметтік бағдарламалар басқармасының бөлім басшысы Асан Нарымбаев.
Биыл Президент Қасым-Жомарт Тоқаевтың тапсырмасымен жасы 35-ке дейінгі жастарға 2,5 пайызбен жеңілдетілген несие беру шаралары ұйымдастырылып жатыр. Бұл да – жұмыссыз жастардың санын азайтуға, кәсіпке ұмтылған жастарды қолдауға арналып отырған жобалардың бірі. Бұл жоба бойынша облыста 181 жас төмен пайыздық мөлшерлемемен несие алып, бүгінде жұмысқа кірісті. Микрокредиттің мерзімі бес жылға дейін, ал мал шаруашылығы саласындағы жобалар үшін жеті жылға дейінгі мерзімге рұқсат етіледі.
Жұмыссыз адамға жұмыс тауып бергеннен бөлек, әлеуметтік қолдау көрсету де аса маңызды.
– Міндетті әлеуметтік сақтандыру жүйесіне қатысушы жұмыссыз ретінде тіркелген күннен бастап жұмысынан айырылу жағдайы бойынша әлеуметтік төлем алуға құқылы. Бүгінгі күні 3 534 жұмыссыз аталған әлеуметтік төлемді алуда, – дейді Асан Нарымбаев.
Жанат ҚАЙЫРҒОЖИНА,
Батыс Қазақстан облысы