Сол кезеңдерде Маман құт ұрпақтары да халық арасында романға бәйге жариялап, саудамен айналысып қаржыларын қайтарымды іске жұмсап, қазақ байларына үлгі-өнеге көрсетіп кетті. Бұл игі іс Біләл Сүлеев, Ілияс Жансүгіров секілді қазақтың біртуар қаламгерлерін қанаттандырса, Арқа төсінде атақты Хасен Ақай мен Қаражан Үкібаевтар да әдебиет пен мәдениеттің өркендеуіне сүбелі үлес қосқан. Бүгінде осы бір дәстүрдің қайта қалыптасып жатқаны көпшіліктің көңілінен шықса, әдебиетші қауым үшін үлкен қолдау болып отыр. Күні кеше елорда төріндегі Ұлттық академиялық кітапханада ел патриоттары мен руханият жанашырларының азаматтық жобасы «Меценат» әдеби сыйлығының алғашқы жеңімпазы жазушы-публицист Шархан Қазығұлдың «Күлпет» романының таныстырылымы өтті. Бұл авторды байқаудың тұңғыш лауреаты атандырған шығарма.
Айта кету керек, әдеби романның авторы өмір бойы ай сайын 500 АҚШ доллары мөлшерінде сыйақы алып отырады. Тәуелсіз бәйгеде топ жарған шығарма туралы жүрекжарды пікірлерін айтуға жиналған белгілі қаламгерлер «Роман – қаламгердің көркем әдебиеттегі дебюті» деп баға берді. Автордың сөзінше, бұған дейінгі шығармаларын тек кәсіби журналист ретінде публицистика жанрында жазған. Ал бұл көркем туындыны жазушы пандемия кезінде жазып шыққан екен.
«Публицистика жанрында тоғыз кітап жаздым. Олардың барлығы жарық көрді. Сөйтіп, жасым ұлғайған соң көрген-білгенімді кесек шығарма арқылы көрсетсем деген ой келді. Пандемия кезінде істейтін жұмыс болмады. Ал мен бос отырғанды ұнатпайтын адаммын. Содан көркем туынды жазуды бастап, романымды бір жыл ішінде жазып бітірдім», – дейді Шархан Қазығұл.
Автордың айтуынша, романның атауының өзіне үлкен мән берілген. Себебі кез келген туындының тақырыбы мен атауы оқырманға интрига, жұмбақ болып тұруы керек. Сондықтан да жазушы романға өзгеше тақырып ойлап тапқысы келген. Бұл үшін ол «Қазақ тілінің түсіндірме сөздігімен» көп жұмыс істеп, ең соңында «Жан азабы» мағынасын беретін «Күлпет» сөзіне тоқталған. Бұл романның лейтмотивіне де сәйкес келіпті.
Шараның тізгінін ұстаған Мемлекет және қоғам қайраткері Сауытбек Абдрахманов: «Бұл – жаңа уақыттың жаңа кітабы. Перспективасы кең. Үш буынның өмірін қамтиды. Локация байлығы да бар. Онда қазақ әдебиетіндегі тым тосын тақырып көтерілген. Мысалы, Ауған соғысынан Америкаға қашқан қазақ азаматы сонда 30 жыл өмір сүріп, екі қоғамды салыстыруға мүмкіндік алып елге оралады. Осы оқиғаның өзі әдебиетке жаңалық әкеліп тұр. «Күлпет» романы әлеуметтік-философиялық роман сыйпатына келеді», – дейді.
Өз кезегінде сөз алған жазушы-драматург Роза Мұқанова да туындының өзіне тән ерекшеліктерін тілге тиек етті. Романның жауапкершілігі жоғары екенін жеткізген қаламгер: «Әңгіме, повесть жазып жүргендердің өзі романға келе алмайтын кезі болады. «Күлпет» романы – қазақ қоғамындағы айтулы оқиғаның бірегейі. Ешкімді қайталамайды, ой, сюжет ұрлығы жоқ. Романда басқа форма, басқа стиль бар. Ол адам жанының азаттығына ұмтылдырады. Ең бастысы, автордың тілі қарапайым әрі түсінікті. Бүгінгі күннің оқырманына ыңғайлы, жылдам оқылады, қарапайым тілмен күрделі нәрселерді түсіндірген шығарма. Бүгінгі оқырман жаңа кейіпкер, жаңа туындыны күтеді. Шархан – жаңа соқпақ салған автор», – деді.
Осыдан кейін жиналғандардың жоғары бағасын алған шығарма жаңа форматтағы жаңа романның тұсауы кесіліп, оқырманға жол тартты. Кітаптың алғашқы даналары салтанатты түрде Ұлттық академиялық кітапханаға табыс етілді.
Ж.МҮСІЛІМ