Financial Times мақаласында Иранның дінбасылары жасанды интеллект әлеуетіне қызығушылық танытып отырғаны жазылды. Aikyn.kz ЖИ жүйелері ұзақ ислам мәтіндерін талдаудан діни пәтуалар шығаруға дейінгі мәселелерде қалай көмектесе алатынын түсіндіреді.
Фото Getty Images сайтынан алынды. Авторы: ATP Images
«Роботтар аға діни қызметкерлерді алмастыра алмайды, бірақ олар 50 күннің орнына бес сағат ішінде пәтуа шығаруға көмектесетін сенімді көмекші бола алады», – дейді Құмдағы технологиялық бизнестің өсуін ынталандыратын ұйымды басқаратын Мохаммад Готби.
Иранның жаңа тарихы дәстүр мен қазіргі заманның қақтығысымен сипатталады. Елдің 200 000 шиит дінбасылары дәстүрлі және діни құндылықтарды қорғауда жетекші күш болып табылады.
Иранның діни бірлестігі 2020 жылы Құм қаласында жасанды интеллект бойынша алғашқы конференция өткізілгеннен бері осы технологияны пайдалану жолдарын іздестіруде.
«Біз бұл салаға ислам өркениетін ілгерілету үшін кіруіміз керек», – деп мәлімдеген еді шілде айында Иранның белгілі дін қызметкері аятолла Алиреза Арафи.
Фото islamnews.ru сайтынан алынды
Иранның рухани көсемі аятолла Әли Хаменеи де діни қызметкерлерді жасанды интеллект мүмкіндіктеріне көбірек көңіл бөлуге шақырып, маусым айында елдің «жасанды интеллект бойынша кем дегенде әлемдегі ең үздік 10 елдің қатарында» болуын қалайтынын айтқан болатын.
Иран Сауд Арабиясы мен Біріккен Араб Әмірліктері сияқты аймақтық көшбасшылардан артта қалды, оларда мемлекетті дамытуда ЖИ-ді қолданудың өршіл жоспарлары бар. Сондықтан да Иранның рухани жетекшілері де діни қызметкерлерге озық технологияны қолдануға рұқсат беріп отыр.
Мохаммад Готби ЖИ технологиясын қолдануды жергілікті жерге бейімдеуге жұмыс істеп жатқандарын айта келе: «Өйткені біздің мәдени құндылықтарымыз әртүрлі», – деп мәлімдеген.