Атап айтқанда, 2023 жылдың 1 қазанындағы мәлімет бойынша, Түркістан облысының бюджетіне 123,5 млрд теңге көлемінде кіріс түсіп, жоспар 106,7 пайызға немесе 7,8 млрд теңгеге асыра орындалды. Өткен жылдың ұқсас кезеңімен салыстырғанда түсім 8,3 млрд теңгеге артқан немесе өсу қарқыны 7,2 пайызды құрап отыр. Бұл туралы Түркістан облысы әкімінің баспасөз қызметі мәлімдеді.
Бюджеттің қаржысын ысырап етпей, жоспарға сәйкес мақсатты түрде жұмсау және қадағалап отыру басты назарда тұр. Түркістан облысының әкімі Дархан Сатыбалдының төрағалығымен өткен апталық аппарат отырысында облыс бюджетінің игерілуі және республикалық бюджет есебінен жобалардың қаржыландырылу барысы қаралды.
Белгілі болғандай, жалпы барлық аудан, қалалар бойынша түсімдер жоспары асыра орындалған.
Аппарат отырысында облыстық Қаржы және мемлекеттік активтер басқармасының басшысы Абдрахман Тасыбаев бірқатар аудан, қалалар есепті кезең жоспарын асыра орындап отырғанымен, кей аудандарда жылдық жоспардың орындалуы төмен екендігін жеткізді.
Оның айтуынша, барлық аудан, қала әкімдеріне түсімдердің әрбір түрі бойынша жоспарын, оның ішінде реттелуші салықтардың ай сайынғы жоспарының орындалуын қамтамасыз ету бойынша тапсырма берілген.
Осы тұрғыда өңір басшысы кейбір бағытта қаржының игерілмей қалуы салалар бойынша атқарылып жатқан жұмыстарға кері әсерін тигізетінін ескертті. Аудан-қала әкімдері мен тиісті басқарма басшыларына барлық қаражат толық, сапалы және уақытылы игерілу мақсатында заңға сәйкес тиісті жұмыстар жүргізуді тапсырды. Жиында отандық өнім мәселесі де қалыс қалмады. Мемлекет тапсырысын орындаушылар арасында отандық өнім өндірушілерге басымдық беруді жүктеді.
– Мен үнемі барлық басқарма басшыларына, аудан, қала әкімдеріне бюджет қаржыларының тиімді әрі мақсатты жоспарлануына және уақытылы игерілуіне қатаң талап болатынын ескертіп келемін. Бюджеттің әр тиынының сұрауы, есебі бар. Жоспарлау дұрыс болса, бұлай болмас еді. Бюджет қаржысын бағыттау барысында да жобалардың мерзімі ескерілмей, қаржы игерілмей жатады. Осының бәрін ескеру керек. Бюджет қаржысын сапалы әрі тиімді игеріп, жоспарланған түпкі нәтижелерге қол жеткізу үшін жұмысты жандандару керек, – деді облыс әкімі Дархан Амангелдіұлы.
Жиында жыл ішінде бюджетті нақтылау барысында облыстың бюджет көлемін республикалық трансфеттер және өз кірістері есебінен ұлғайту барысы талқыланды.
Тельман БЕЙСЕН, Түркістан облысы