Өйткені кен қоры азайып, барын алу тым күрделеніп кеткен еді. Осылайша, қала құраушы басты кәсіпорынның өндірісі ықшамдалғалы бері кеншілер шаһарында басқа баламалы кәсіптер көзін игеруге ден қойыла бастаған. Бір жақсысы, тау қойнауында қорғасын мен мырыштан басқа да пайдалы қазбалар баршылық. Тек ретін келтір де, кіріс көзіне айналдыр. Сонымен бірге еліміздің басқа өңірлерімен байланыс орнатып, отандық шикізатты қажетке жаратып, сұранысқа ие өнімдер шығаруды да қолға алып, пайдасын көріп отырғандар бар.
Шағын қаладағы жергілікті немесе басқа аймақтардан жеткізілген отандық шикізатты пайдаланып, өндірісін өркендетіп, қалалықтарға жұмыс орындарын ашып отырған кәсіпорындардың бірі – Ak Altyn Products ЖШС. Құрылысқа қажетті әк өндіретін зауытқа қазір жұмысшылар керек. Бүгінде кәсіпорынға электромеханик, электрослесарь мамандары жетіспейді.
Кәсіпорын директоры Данияр Ысқақовтың айтуынша, Ak Altyn Products ЖШС 2018 жылдан бері жұмыс істейді. Алғашында 1-сортты езілген және езілмеген ұсақ әк шығару желісі іске қосылса, 2020 жылы құрылысқа арналған гипс сылағы, кафель желімі, блок желімі сияқты құрғақ қоспалар шығаратын желі орнатылып, қосымша жаңа өндіріс жолға қойылған. Ал 2021 жылы осы желіге қосымша құрылғылар орнатылып, өндіріс көлемі бұрынғыдан да арта түскен. Жалпы, зауыттың толық қуаты тәулігіне 60 тонна әк, 25 тонна құрғақ қоспа шығаруға қауқарлы. Биылғы 9 айда мұнда 4 500 тонна әк, 3 500 тонна құрғақ қоспа өндірілген. Компания өнімдері құрылыста, металлургия мен химия өнеркәсібінде, сәулет өнерінде және ауыл шаруашылығында кеңінен қолданылады және осындай құрылыс материалдарына деген сұранысты қанағаттандыруға мүмкіндігінше үлес қосып отыр.
«Біздің кәсіпорын Павлодардағы алюминий, Балқаштағы кен байыту зауыттарымен тығыз байланыста жұмыс істейді. Негізгі шикізатты қазір Жамбыл облысынан әкелеміз. Өнімдерімізге сұраныс өте көп. Алматы мен Тараз, Шымкент, Қапшағай қалаларынан, өзіміздің Талдықорғаннан тапсырыстар жиі болады және оларды уақытында орындап отырмыз», – дейді зауыт басшысы.
Қазір кәсіпорында 55 адам жұмыс істейді. Түгелге жуығы – жергілікті тұрғындар. Олардың айлық жалақысы 150-160 мың теңге көлемінде. Серіктестік жұмысшылары арнайы жұмыс киімімен қамтамасыз етілген. Мүмкіндікке сай басқа да жағдайлар ойластырылған. Болашаққа бағытталған біршама жоспар да бар көрінеді. Қазір жұмысшыларға сұраныстың артып отырғаны да өндірістің өркен жая бастағанының белгісі. Мекеме басшысының айтуынша, әсіресе электромеханик, электрослесарь мамандарына қажеттілік тым өзекті болып тұр. Сонымен бірге кәсіпорын жақында Ескелді ауданы аумағынан кен орнын анықтап, қазір оны пайдалануға рұқсат алудың тиісті құжаттарын әзірлеуде. Осыған орай Қытайдан жаңа құрал-жабдықтар әкеліп, кәсіпорынды кеңейтіп, қосымша қойма салу жоспарланған. Сол кезде қосымша тағы 20 жұмыс орны ашылмақ. Бұған қоса, келесі жылы зауытқа газ тарту жұмысы қолға алынады. Мұнда да қосымша жұмыс орындары қажет болары сөзсіз. Зауыт газға қосылған соң экологиялық мәселелер де келмеске кетіп, қосымша шығын да азаяды.
Болат АБАҒАН,
Жетісу облысы